رۆژی سێشەممە، بە ئامادەبوونی حەمەی حەمەسەعید، وەزیری رۆشنبیری و لاوانی حکومەتی هەرێمی کوردستان، لە هەریر، یەکەم کۆنفرانسی نێودەوڵەتی زانستیی عەلی حەریری دەستیپێکرد.
کۆنفرانسەکە بە درووشمی “عەلی حەریری؛ سوارچاکی شیعر و پێشەنگی داهێنان” لە لایەن زانکۆی سەلاحەدین، کۆلیژی پەروەردە – شەقڵاوە سازدراوە و ئەمە دووەم کۆنفرانسی نێودەوڵەتی کۆلیژەکەیە.
لە تەوەرێکی کۆنفرانسەکەدا، وەزیری رۆشنبیری و لاوان خەڵاتی رێزلێنانی پێشکەش بە ژمارەیەک پانێلیستەکان کرد.
لە ناساندنی کۆنفرانسەکەدا، کۆلیژی پەروەردە – شەقڵاوە رایگەیاندووە، كۆنفرانسەکە هەوڵێکە بۆ خوێندنەوەیەكی زانستیی لەبارەی ژیان و شیعرەكانی یەكێك لە پێشەنگانی شیعری كوردی، عاریف و شاعیری ناسراو عەلی حەریری (1530-1600) لە بوارە جۆربەجۆرەكانی ئەدەبیات، تەسەوف، زمان و ئایین وەك دەروازەیەك بۆ زیاتر ناساندنی تا بەو هۆیەوە توێژینەوەی ئەكادیمیی لەبارەوە بۆ بكرێ و لە وردەكارییەكانی ژیان و بەرهەمی بكۆڵدرێتەوە و ببێتە بناغەیەكی روونتر بۆ بینای مێژووی ئەدەبی كوردی.
تەوەرە سەرەکییەکانی کۆنفرانسەکە، تایبەت بوون بە ژیان، بەرهەم و ئەفراندنی عەلی حەریری و کاریگەری بەرهەمەکانی لەسەر شاعیرانی دوای خۆی و کاریگەرییەکانی تەسەوف و عیرفانی کوردی لەسەر بەرهەمەکانی.