رێوڕەسمی پێنجەمین ساڵیادی کۆچی دوایی هونەرمەند سەعید گاباری، لە هۆڵی راگەیاندن لە بەشی رۆشنبیری و راگەیاندنی پ.د.ک لە هەولێر بەڕێوەچوو.
رێوڕەسمەکە، رۆژی یەکشەممە بە ئامادەبوونی زەعیم عەلی، ئەندامی مەکتەبی سیاسیی پ.د.ک، د. سالار عوسمان بەرپرسی بەشی رۆشنبیریی و راگەیاندن، بڵند ئیسماعیل بەرپرسی لقی 2ـی پ.د.ک، عەلی عەونی و سەگڤان هالۆ ئەندامانی کۆمیتەی ناوەندی، زکری موسا، نوێنەری سیداد بارزانی، عبدولحەکیم بەشار، ئەندامی مەکتەبی سیاسیی پارتی دیموکراتی کوردستان – سووریا و ئیبراهیم بڕو بەرپرسی پەیوەندییەکانی دەرەوەی ئەنەکەسە، هەروەها بنەماڵە و هەڤاڵانی هونەرمەندی کۆچکردوو و ژمارەیەک پەرلەمانتار، نووسەر، رۆشنبیر و هونەرمەند بەڕێوەچوو.
د. سالار عوسمان وتارێکی و تێیدا ئاماژەی بەوەکرد، لە تایتڵی سەعید گاباری دەنگێک بۆ ئەڤین و ئازادی؛ لەو راستییە تێدەگەین کە ئەو دەنگانەی بۆ ئەڤین و ژیاندۆستی و مرۆڤدۆستی و خۆشەویستی گۆرانیان چڕیوە و شیعرییان ھۆنیوەتەوە و خەباتیان کردووە، ئەوانە مرۆڤە نەمرەکانن، ھەم دیسان ئەگەر لە چەمکی دووەم وردبینەوە کە بریتییە لە ئازادی تێدەگەین؛ ئەو ھونەرمەند و نووسەر و رۆشنبیرانەی لەگەڵ پێشمەرگە، پێشمەرگەئاسا بەرگرییان لە کوردستان کردووە، ئەوانە نەمرتر و قووڵتر دەچنە بەر دیرۆک و ھەمومان شانازیان پێوە دەکەین.
نمایشکردنی دۆکیۆمێنتارییەک سەبارەت بە ژیان و بەرهەمی سەعید گاباری بەشێکی دیکەی رێوڕسمەکە بوو و هۆشیار تاهیر کانیکی، هەڤاڵی هونەرمەندی کۆچکردوو چەند پارچە شیعرێکی خوێندەوە، پاشان تابلۆیەکی میوزیک و ستران لەلایەن هونەرمەند عەدنان سەعید پێشکەشکرا.
لە بەشیکی رێوڕسمەکەدا بەشی رۆشنبیریی و راگەیاندنی پارتی دیموکراتی کوردستان خەڵاتی رێزلێنانی پێشکەش بە خانەوادەی سەعید گاباری کرد.
لەکوتاییدا گوتاری خانەوادەی ڕەوانشاد لەلایەن ئیبراهیم گاباری پێشکەش کرا و تێیدا سوپاسی پارتی دیموکراتی کوردستان و بەشی ڕۆشنبیری و راگەیاندنی کرد بۆ ئەنجامدانی ئەم مەراسیمە و ڕێزگرتن لە خەباتی هونەرمەندی کوچکردوو سەعید گاباری.