ئەکتەری ناوداری جیهان، براد پیت، هۆکاری ئەوەی ئاشکرا کرد کە بۆچی دەرهێنەری بەناوبانگ کوێنتن تارانتینۆ، دەرهێنانی بۆ فیلمی “The Adventures Of Cliff Booth” نەکردووە، کە لە فیلمی “Once Upon A Time In Hollywood” وەرگیراوە.
پیت پشتڕاستیکردەوە دەیڤد فینچەر کاری دەرهێنانی فیلمەکەی گرتووەتە ئەستۆ و تارانتینۆ تەنیا سیناریۆکەی نووسیوە.
پیت لە لێدوانێکیدا بۆ ماڵپەڕی “Deadline” گوتی: “ئەمە کارێکە کوێنتن تارانتینۆ نووسیویەتی و بە کارێکی سەربەخۆ دادەنرێت، نەک بەشی دووەم. ئەو نەیویست لەم قۆناغەدا دەرهێنانی بۆ بکات، بۆیە هاوڕێکەمان دەیڤد فینچەر هاتە پێشەوە”.
هەروەها گوتی: “لە مانگی تەممووزدا دەست بە وێنەگرتن دەکەین و زۆر خۆش دەبێت”.
فیلمەکە لەلایەن نێتفلێکسەوە نمایش دەکرێت و ئەکتەرانی وەک کارلا گوجینۆ، یەحیا عەبدولمەتینی دووەم و ئێلیزابێس دێبیکی تێیدا بەشدارن.
بودجەی فیلمەکە نزیکەی 200 ملیۆن دۆلارە، تێیدا تارانتینۆ بڕی 20 ملیۆن دۆلاری تەنیا بۆ نووسینی سیناریۆکە وەرگرتووە.