وەرزی سێیەمی زنجیرەی بەناوبانگی کۆری “Squid Game”، لەدوای نمایشکردنی لە تۆڕی نێتفلیکس، رووبەڕووی پێشوازییەکی سارد و نائومێدکەرانە بووەتەوە لەلایەن بینەران و رەخنەگرانەوە، ئەمەش بووەتە هۆی دابەزینێکی بەرچاو لە هەڵسەنگاندنەکانیدا.
لە کاتێکدا وەرزی یەکەم سەرکەوتنێکی مێژوویی تۆمارکرد و هەڵسەنگاندنی 95٪ـی لەلایەن رەخنەگران و 84٪ـی لەلایەن بینەرانەوە بەدەستهێنا، بەڵام وەرزی سێیەم رووبەڕووی دابەزینێکی توند بووەتەوە، بەتایبەت لەلایەن بینەرانەوە کە هەڵسەنگاندنیان بۆ 50٪ دابەزیوە، لە کاتێکدا رەخنەگران 80٪یان پێداوە.
ئەم دابەزینە پرسیاری لەسەر داهاتووی زنجیرەکە دروست کردووە؛ ئایا بیرۆکەی سەرەکیی زنجیرەکە گەیشتووەتە کۆتایی و توانای نوێبوونەوەی نەماوە؟ یان ئایا سەرکەوتنە زەبەلاحەکەی وەرزی یەکەم بووەتە بارگرانییەک و ستانداردێکی ئەستەمی بۆ بەشەکانی دواتر داناوە؟
زنجیرەکە کە رەخنە لە سیستەمی سەرمایەداری دەگرێت، ئێستا رەخنەی ئەوەی لێ دەگیرێت کە خۆی بووەتە قوربانیی هەمان ئەو سیستەمە و بۆ مەبەستی بازرگانی درێژ دەکرێتەوە.