لە تۆڕە کۆمەڵایەتییەکاندا بانگەوازێکی بەرفراوان بۆ هەڵوەشاندنەوەی کۆنسێرتی گرووپی رۆکی ئەڵمانی سکۆرپیۆنس (Scorpions) لە قاهیرە دەستیپێکردووە، کە بڕیارە لە مانگی ئۆکتۆبەردا سازبکرێت.
چالاکوانان گرووپەکە بە “پشتگیریکردنی ئیسرائیل” و سازکردنی کۆنسێرت لە تەلئەبیب تۆمەتبار دەکەن و دەڵێن، هاتنیان بۆ میسر “جۆرێکە لە ئاساییکردنەوەی کولتووریی رەتکراوە”.
سەندیکا هونەرییەکانی میسر هەڵوێستێکی مێژووییان هەیە لە دژی ئاساییکردنەوەی پەیوەندییەکان. عومەر عەبدولعەزیز، سەرۆکی یەکێتیی سەندیکا هونەرییەکان رایگەیاندووە، رێگە بە هیچ هونەرمەند و گرووپێک نادەن کە پشتگیریی ئیسرائیل بکات لە میسر کۆنسێرت ساز بکات و بۆ دەرکردنی بڕیارێکی فەرمی لەگەڵ سەندیکای مویزیکژناندا راوێژ دەکەن.
پێشتریش لە میسر کۆنسێرتی گۆرانیبێژی ئەمریکی تراڤیس سکۆت و دی جەی ئەڵمانی ماری مۆنتێکسێر بەهۆی هەڵوێستی سیاسی و پشتگیریکردنیان لە ئیسرائیل هەڵوەشێنرابوونەوە.