ئەنجلینا جۆلی، ئەکتەری ناوداری ئەمریکی، لە پۆستێکیدا لە تۆڕی کۆمەڵایەتیی ئینستاگرام، ئاماژەی بەو هۆشدارییانە کرد کە رێکخراوەکانی مافی مرۆڤ لەبارەی برسیکردن و کوشتنی منداڵان لە غەززە بڵاویانکردووەتەوە و رایگەیاند: “ئەم جۆرە لێدوان و ئاگادارکردنەوە مەترسیدارانە دەبێت کاریگەرییان هەبێت. ئێمە وەک مرۆڤ مافمان هەیە، نەک لەبەر ئەوەی کێین یان لە کوێ دەژین.”
جۆلی نووسیویەتی: “جێگەی شۆکە کە دەبینین ژیانی مرۆڤی بێتاوان و ئەو پرەنسیپانەی زۆربەمان باوەڕمان پێیانە، بەم شێوەیە پشتگوێ دەخرێن.”
ئەو ئەم دۆخە بە “درێژکراوەی دەیان ساڵ لە بەرگریی هەڵبژاردەیی لە مافەکانی مرۆڤ” وەسف دەکات و دەڵێت: “ئەمە دەرئەنجامی مامەڵەکردنە لەگەڵ ژیانی هەندێک کەس وەک گرنگ و ژیانی هەندێکی دیکە وەک شایەنی فڕێدان.”
ناوبراو رەخنەی توندی لە ئەنجوومەنی ئاسایشی نەتەوە یەکگرتووەکان گرت و ئاماژەی بەوەدا کە ژمارەی ئاوارەکان لە جیهاندا دوو هێندە زیادی کردووە، لەنێویاندا: “سودانی، سوری، ئەفغانی، ئۆکراینی و فەلەستینییەکان.”
جۆلی جەختی لەوە کردەوە کە “هیچ کام لەمانە بە رێکەوت روونادەن، بەڵکو بە ئەنقەستە” و لە کۆتاییدا هۆشداریی دا و گوتی: “ئەوانەی دەسەڵاتی پاراستنی یاسای مرۆیی نێودەوڵەتییان هەیە، بەڵام هیچ ناکەن، هاوبەشی بەرپرسیارێتین. ئەو شتانەی بەرگەیان دەگرین، پێناسەی ئێمە دەکەن”.