وا دیارە حەز و خولیا بۆ جیهانی نواندن لەنێو خوێنی خێزانی دۆگلاسدا دەگەڕێت، چونکە کاریس دۆگلاس، کچی هەردوو ئەستێرەی بەناوبانگ کاترین زیتا-جۆنز و مایکل دۆگلاس، ئاشکرای کرد کە ئارەزووی ئەوە دەکات بچێتە ناو جیهانی نواندنەوە و شوێنپێی دایک و باوکی لە هۆلیوود هەڵبگرێت.
کاریسی تەمەن ٢٢ ساڵ، لە لێدوانێکدا بۆ گۆڤاری “People”ی ئەمریکی گوتی: “من لە منداڵییەوە لەسەر شانۆ نواندنم کردووە، هەرچەندە لە زانکۆ نواندنم نەخوێندووە، بەڵام دڵخۆشم کە لە ژینگەیەکی هونەریدا گەورە بووم کە ئەزموونم دەوڵەمەند دەکات، و هیوادارم بتوانم کاری زیاتر لەم بوارەدا بکەم”.
کاریس بەم دواییانە لە زانکۆی براون بڕوانامەی لە بواری سینەما و پەیوەندییە نێودەوڵەتییەکان بەدەستهێناوە، جەختیش لەوە دەکاتەوە کە دەیەوێت لە کارەکانیدا هونەر و بیرکردنەوە تێکەڵ بکات.
ماڵپەڕی “Radar Online” پێشتر بڵاوی کردبووەوە کە پەیوەندی نێوان دایک و باوکی تووشی کەمێک گرژی بووە، دوای ئەوەی زیتا-جۆنز باسی لەوە کردبوو کە خاوەنی چوار خانووی گرانبەهان لە سێ وڵاتی جیاوازدا، ئەمەش مایکل دۆگلاسی تووڕە کردبوو چونکە پێی وابوو وەک خۆهەڵکێشان بە سامانەوە دەرکەوتوون.