حەمەی حەمەسەعید، وەزیری ڕۆشنبیری و لاوانی حکومەتی هەرێمی کوردستان لە بارەی سیاسەتی کولتووریی لە هەرێمی کوردستاندا پەیامێکی ئاراستەی ڕۆشنبیر و نووسەر و ئەکادیمییەکانی کوردستان کرد.
رۆژی یەکشەممە، لە چوارچێوەی کارەکانی دووەم ڕۆژی یەکەم دیداری زانستیی “سیاسەتی کولتووری”، وەزیری ڕۆشنبیری و لاوان لە وتەیەکدا، ڕایگەیاند، وەزارەت چاوەڕوانی کارابوونی پەرلەمانی کوردستان دەکات، بۆ ئەوەی پەرلەمان پڕۆژەیاسای سیاسەتی کولتووری لە هەرێمی کوردستان بخاتە کارنامەی کارییەوە و وەک یاسا پەسندی بکات.
گوتیشی: پڕۆژەکە، هێشتا لە قۆناغی داڕشتنەوەدایە و پێویستیی بە ڕا و شارەزایی و ئەزموون و پێشنیازی دڵسۆزان و خەمخۆرانی سیاسەتی کولتوورییە لە کوردستاندا بۆ ئەوەی کامڵ بکرێت.
حەمەی حەمەسەعید، وەزیری ڕۆشنبیری و لاوان بانگەوازی کرد، هەر کەس و ناوەندێکی کولتووری و زانستیی لە ناوخۆ و دەرەوەی کوردستان، پێشنیاز و بۆچوونێکی هەیە بۆ دەوڵەمەندکردنی پڕۆژەکە، ئاراستەی وەزارەتی ڕۆشنبیری و لاوانی بکات، بۆ ئەوەی کاری لەسەر بکرێت.
ئاماژەی بۆ ئەوەشکرد: لە وەزارەتدا لیژنەیەکی تایبەتمەند بە داڕشتنی پڕۆژەی سیاسەتی کولتووری لە ئەرکدایە و هەر پێشنیاز و ڕاسپاردە و بۆچوونێک ئاراستەی وەزارەت بکرێت، دەخرێتە بەردەست ئەو لیژنەیە بۆ لەبەرچاوگرتن و جێکردنەوەی لە پڕۆژەکەدا.
پڕۆژەی سیاسەتی کولتووری لە وەزارەتی ڕۆشنبیری و لاوان، لە کۆتایی کابینەی هەشتەمدا کاری سەرەتایی لە بارەوە کرابوو و لە کابینەی نۆیەمدا، وەزیری ڕۆشنبیری و لاوان لیژنەیەکی تایبەتمەندی ڕاسپارد بۆ تەواوکردنی کارەکانی و بە هۆی کارانەبوونی پەرلەمانی کوردستانەوە، نەتوانراوە لە ڕێگەی ئەنجوومەنی وەزیرانەوە پڕۆژەکە ڕەوانەی پەرلەمان بکرێت.
رۆژی شەممە 29ـی تشرینی دووەمی 2025، بە چاودێری و ئامادەبوونی حەمەی حەمەسەعید، وەزیری ڕۆشنبیری و لاوانی حکومەتی هەرێمی کوردستان، یەکەم دیداری زانستیی سیاسەتی کولتووری لە شاری سلێمانی دەستی پێکرد و ئەمڕۆ دووەم ڕۆژی کارەکانی بە وتارێکی وەزیری ڕۆشنبیری و لاوان کۆتایی پێهێنا و بڕیار وایە ڕاسپاردەکانی کۆنفرانسەکە کاریان لەسەر بکرێت لە پێناو گەشەپێدان و پێشخستنی ناوەڕۆکی پڕۆژەی سیاسەتی کولتووری لە وەزارەت.