مايلی سايرس، ئەستێرەی جیهانی، ئاشکرای کرد، ئەزموونی تاڵی لەدەستدانی ماڵەکەی لە ساڵی ٢٠١٨، بووەتە ئیلهامبەخش بۆ گۆرانییە نوێیەکەی بەناوی (Dream as One) کە بۆ فیلمی (Avatar: Fire and Ash) ئامادەی کردووە.
سايرسی تەمەن ٣٣ ساڵ، رایگەیاند کە ناونیشانی فیلمەکە “ئاگر و خۆڵەمێش” کاریگەرییەکی راستەوخۆی لەسەر ژیانی هەبووە، بەوپێیەی لە ساڵی ٢٠١٨ بەهۆی ئاگری دارستانەکانەوە ماڵەکەی لە مالیبو لەدەستدا. ئەو دەڵێت: “ئەزموونێکی کەسییم لەگەڵ بونیاتنانەوە لە سفرەوە هەبوو، ئەمەش بووە بنەمای سۆزداریی گۆرانییەکە”.
ئەم گۆرانییە کە هاوکاتە لەگەڵ ئاگرکەوتنەوەکانی سەرەتای ساڵی ٢٠٢٥ لە لۆس ئەنجلس، باس لە یەکگرتوویی، خێزان و دۆزینەوەی هێز لە کاتی تەنگانەدا دەکات. سايرس ئاماژە بەوە دەکات کە توانای هەستانەوە لە دوای شکان، جەوهەری چیرۆکی نوێی ئاڤاتارە.