دادگایەکی ئەمریکا بڕیاری کۆتایی لەبارەی جیابوونەوەی نیکۆڵ کیدمەن و کیس ئۆربن دەرکرد، بەو پێیەش یەکێک لە بەناوبانگترین هاوژینەکانی هۆلیوود کۆتایی بە ژیانی هاوبەشییان هێنا.
دادوەرێک لە شاری ناشڤیڵی ویلایەتی تێنسی، بڕیاری هەڵوەشاندنەوەی هاوسەرگیرییەکەیانی واژۆ کرد. بەگوێرەی بەڵگەنامەکانی دادگا، نیکۆڵ کیدمەن و کیس ئۆربن کە هەردووکیان تەمەنیان 58 ساڵە، لەسەر دابەشکردنی سامانی هاوبەش و مافی سەرپەرشتیکردنی منداڵەکانیان گەیشتوونەتە رێککەوتن.
کیدمەن لە مانگی ئەیلوولی رابردوو داوای جیابوونەوەی پێشکەش کردبوو، هۆکارەکەشی بۆ “کێشەی خێزانی و نەگونجان” گەڕاندبووەوە. بەپێی رێککەوتنەکە، کیدمن دەبێتە سەرپەرشتیاری سەرەکیی دوو کچە هەرزەکارەکەیان و هیچ کام لە لایەنەکان داوای “نەفەقە” و هاوکاری داراییان لە یەکدی نەکردووە.
ئەمە دووەم جیابوونەوەی نیکۆڵ کیدمەنە دوای ئەوەی لە ساڵی 2001 لە تۆم کرووز جیا بووەوە.