ئەکتەری ئەمریکی تیمۆتی شالامێت توانی دەستکەوتێکی گەورە لە کاروانی هونەریدا تۆمار بکات دوای ئەوەی یەکەم خەڵاتی “گۆڵدن گڵۆب”ی بەدەستهێنا.
لە ئاهەنگی دابەشکردنی خەڵاتەکانی ساڵی ٢٠٢٦، شالامێت خەڵاتی باشترین ئەکتەری لە فیلمێکی سینەمایی (کۆمیدی یان میوزیکی) بۆ ڕۆڵەکەی لە فیلمی “Marty Supreme” بردەوە.
ئەم سەرکەوتنە دوای پێنج جار کاندیدکردنی پێشوو هات، کە تێیدا توانی بەسەر ئەکتەرە گەورەکانی وەک جۆرج کلۆنی و لیۆناردۆ دیکاپریۆدا سەربکەوێت.
لە کاتی وەرگرتنی خەڵاتەکەدا، شالامێت بە ساتێکی ڕۆمانسی لەگەڵ خۆشەویستەکەی کایلی جێنەر سەرنجی هەمووانی ڕاکێشا. لە وتارەکەیدا سوپاسی باوکی کرد کە فێری “سوپاسگوزاری” کردووە و گوتی کە لە ساڵانی ڕابردوودا بەبێ خەڵات ئاهەنگەکەی جێهێشتووە بەڵام هەمیشە سەربەرز بووە.
شالامێت ئەم ساتەی بە “زۆر شیرین” وەسف کرد و سوپاسی هاوبەشی ژیانی و تیمی فیلمەکەی کرد. ئەم خەڵاتە تەنها چەند ڕۆژێک دوای وەرگرتنی خەڵاتێکی دیکە لە میهرەجانی “پالم سپرینگس” دێت، کە پێگەی ئەو وەک یەکێک لە دیارترین ئەستێرەکانی نەوەی نوێ لە هۆلیوود جێگیرتر دەکات.