محەمەد فەزل شاکر، کوڕی هونەرمەندی لوبنانی فەزل شاکر، لە پەراوێزی بەشداریکردنی لە ئاهەنگی “Joy Awards 2026” لە سعودیا، زانیاری نوێی لەبارەی بارودۆخی باوکی ئاشکرا کرد.
محەمەد دڵنیایی دایە هەوادارانی کە باری تەندروستی باوکی جێگیرە، ئەمەش دوای ئەوەی لە ماوەی ڕابردوودا دەنگۆی تێکچوونی تەندروستی لە کاتی دەستبەسەرکردنیدا بڵاوکرایەوە. محەمەد ئاماژەی بەوە کرد کە ڕێکارە یاساییەکان بە شێوەیەکی ئاسایی بەڕێوە دەچن و خێزانەکەی گەشبینن بەوەی بەم زووانە کێشەکانی باوکی کۆتاییان بێت و بگەڕێتەوە ناو کایەی هونەری.
لە ڕووی یاساییەوە، پێشهاتی گرنگ لە کەیسەکەی فەزل شاکردا ڕوویانداوە؛ شێخ ئەحمەد ئەسیر بێبەریبوونی فەزل شاکری لە ڕووداوەکانی “عەبرا” ڕاگەیاندووە و ئاماژەی بەوە کردووە کە ناوی ئەو هونەرمەندە بەبێ بەڵگەی ڕاستەقینە تێوەگڵێنراوە.
هەروەها لێکۆڵینەوە بانکییەکان سەلماندوویانە کە فەزل شاکر هیچ پارەیەکی بۆ گرووپە توندڕەوەکان دابین نەکردووە.