ئەستێرەی ناوداری ئەمریکی جەیسۆن مۆمۆا، لە میانی بانگەشەکردن بۆ فیلمە نوێیەکەی “The Wrecking Crew”، ئاوڕێکی لە سەرەتاکانی کاری هونەری دایەوە.
مۆمۆا ئاماژەی بەوە کرد کە بەشداریکردنی لە زنجیرەی خەیاڵی زانستی “Stargate Atlantis” لە ساڵی 2004، وەک قۆناغی “خوێندنی زانکۆ” وابوو بۆی. ئەو ئەکتەرە کە ئێستا تەمەنی 46 ساڵە، ڕایگەیاند کە لە تەمەنی بیستەکانیدا چوار ساڵ ئەزموونی چڕوپڕی لەو زنجیرەیەدا بەدەستهێناوە، کە ساڵانە نۆ مانگ سەرقاڵی وێنەگرتنی 22 ئەڵقە بووە.
مۆمۆا ڕوونیکردەوە کە خێرایی وێنەگرتن، کە هەر ئەڵقەیەک تەنها هەفتە و نیوێکی خایاندووە، فێری کردووە چۆن لەگەڵ ژینگەی کارکردن ڕابێت و کارامەیی جەستەیی و نواندنی خۆی پەرەپێ بدات، بە تایبەت لە دیمەنە ئەکشنەکاندا.
ئەو جەختی کردەوە کە ئەو قۆناغە بەبێ فشاری بەرهەمە زەبەلاحەکان، دەرفەتی تاقیکردنەوە و فێربوونی پێ بەخشیوە و تا ئێستاش پەیوەندی لەگەڵ تیمی کارەکەدا ماوە و سوپاسی پشتیوانی بەردەوامی هەوادارانی ئەو زنجیرەیە دەکات.