دۆناڵد ترەمپ، سەرۆکی ئەمریکا، جارێکی دیکە مشتومڕی نایەوە دوای ئەوەی هێرشێکی توندی کردە سەر نمایشی گۆرانیبێژی پۆرتۆریکۆیی “باد بانی” لە کاتی پشووی یاری سۆپەر بۆڵ 2026.
ترەمپ لە ڕێگەی پلاتفۆرمی “تروس سۆشیاڵ”ەوە نمایشەکەی بە “شەقێک لە دەموچاوی ئەمریکا” وەسف کرد و گوتی کە یەکێک بووە لە خراپترین نمایشەکانی مێژوو کە هیچ داهێنان و بەهایەکی تێدا نەبووە.
ترەمپ بەتایبەت ڕەخنەی لەوە گرت کە هەموو نمایشەکە بە زمانی ئیسپانی بووە و ئاماژەی بەوە کرد، زۆرینەی خەڵک لەوە تێنەدەگەیشتن کە چی دەوترێت، هەروەها ڕەخنەی لە شێوازی سەماکردنەکان گرت و بە نەشیاو بۆ منداڵانی ناوبرد.
لە بەرامبەردا، باد بانی توانی مێژوو تۆمار بکات بە پێشکەشکردنی نمایشێکی تەواو لاتینی کە گوزارشتی لە کولتووری ڕیگیتۆن و یەکگرتوویی وڵاتانی ئەمریکا دەکرد. ئەم ڕووداوە جارێکی تر کێشە کولتووری و سیاسییەکانی ناو ئەمریکای سەبارەت بە کۆچبەران و زمان و ناسنامە زیندوو کردەوە.