ئەستێرەی جیهانی تارۆن ئیجێرتۆن، کە بە ڕۆڵەکەی لە زنجیرە فیلمی(Kingsman) ناسراوە، بە فەرمی کۆتایی بەو دەنگۆیانە هێنا کە دەیانوت ئەو دەبێتە جێگرەوەی دانیال کریگ بۆ گێڕانی ڕۆڵی سیخوڕی بەناوبانگ جەیمس بۆند.
ئیجێرتۆن لە چاوپێکەوتنێکی نوێدا لەگەڵ گۆڤاری (Variety) ڕایگەیاند، ئەو خۆی بە گونجاو نازانێت بۆ ئەم ڕۆڵە و هەرگیز هەستی نەکردووە کە دەتوانێت ببێتە بریکاری 007.
ئەم لێدوانانە لە کاتێکدایە کە هەوادارانی سینەما بە تامەزرۆییەوە چاوەڕێی ناسنامەی جەیمس بۆندی نوێ دەکەن و چەندین ناوی وەک هێنری کاڤێل، جەیکۆب ئێلۆردی و ئارۆن تایلۆر جۆنسن لە کێبڕکێدایە.
ئیجێرتۆن ئاماژەی بەوە کرد، ئەو کەسایەتییەکی بە هات و هاواری هەیە و ئەمەش لەگەڵ سروشتی کەسایەتیی ئایکۆنیی جەیمس بۆنددا ناگونجێت.