ئەکتەری بەناوبانگ کریستیان بێڵ، بۆ یەکەمجار بۆچوونی خۆی لەسەر هەواڵی بەرهەمهێنانی وەشانێکی نوێ لە فیلمی “American Psycho” دەربڕی کە بڕیارە لەلایەن لۆکا گوادانینۆوە دەرهێنانی بۆ بکرێت.
بێڵ کە لە ساڵی 2000ـدا بە ڕۆڵی “پاتریک بەیتمان” ناوبانگێکی جیهانیی پەیدا کرد، لە کاتی نمایشکردنی فیلمە نوێیەکەیدا بە ناوی“The Bride!” ڕایگەیاند کە هیوای سەرکەوتن بۆ هەر کەسێک دەخوازێت کە بیەوێت ئەو ڕۆڵە تاقی بکاتەوە. ئەو گوتی: “من چێژێکی زۆرم لە کارکردن لەگەڵ ماری هارۆن بینی و یادگارییەکی خۆشم هەیە، هەر کەسێکیش بیەوێت دووبارە ئەو ڕۆڵە بگێڕێتەوە، دەبێت مرۆڤێکی بوێر بێت.”
ئەم فیلمە نوێیە دووبارە کردنەوەی فیلمەکەی بێڵ نییە، بەڵکو وەشانێکی نوێیە لە ڕۆمانی ساڵی 1991 برێت ئیستۆن ئێڵیس. لۆکا گوادانینۆ، دەرهێنەری فیلمەکە، ئاماژەی بەوە کردووە کە کار لەسەر ئەوە دەکەن ئەم بەرهەمە نوێیە بە شێوەیەکی جیاواز لە کتێبەکەوە وەربگیرێت.
هەرچەندە تا ئێستا ئەکتەری سەرەکی دیاری نەکراوە، بەڵام بەرهەمهێنەرانی فیلمە ڕەسەنەکە بۆچوونی جیاوازیان هەیە. هەندێکیان پێیان وایە کە نواندنەکەی کریستیان بێڵ ئەوەندە ناوازە بووە کە گۆڕینی زۆر قورسە، بەڵام هەندێکی تریشیان وەک کریس هانلی، پشتگیری لە لۆکا دەکەن و دەڵێن ئەو دەرهێنەرێکی گەورەیە و هەرگیز فیلمی خراپی بەرهەم نەهێناوە.
ئەم پڕۆژە نوێیە چاوەڕوانییەکی زۆری لە لایەن هەوادارانی سینەماوە بۆ دروست بووە.