سێلین دیۆن، ئەستێرەی کەنەدی، ئامادەکاری دەکات بۆ گەڕانەوە بۆ سەر تەختەی شانۆ و دوێنێ هەینی تیکتی کۆنسێرتەکانی لە ڕێگەی ماڵپەڕی AXS خرانە ڕوو.
ڕێکخەرانی کۆنسێرتەکە باس لەوە دەکەن کە خواستێکی زۆر لەسەر تیکتەکان هەیە و سیستەمی کڕینەکە لەسەر بنەمای “کێ زووتر بێت” دەبێت. داوا لە هەواداران دەکرێت کە پێشوەختە ئەژماری تایبەتی خۆیان دروست بکەن و زانیارییەکانی پارەدان ئامادە بکەن بۆ ئەوەی لە کاتی کڕیندا کاتیان لێ نەڕوات.
هەروەها ڕێنمایی دەدرێت کە بەکارهێنەران تەنیا یەک لاپەڕە بکەنەوە و پەنا بۆ بەکارهێنانی VPN نەبەن، چونکە ڕەنگە سەرەیان لەدەست بدەن.
سێلین دیۆن کە بۆ ماوەی چەند ساڵێک بەهۆی نەخۆشییەوە لە گۆرانیگوتن دوور کەوتبووەوە، ئێستا بە پەرۆشەوە چاوەڕێی بینینی جەماوەرەکەی دەکات.
لە ئەگەر نەمانی تیکتەکاندا، تەنیا ڕێگەی فەرمی بۆ کڕینەوەی تیکت بەکارهێنانی ئەو پلاتفۆرمانەیە کە ڕێگەیان پێدراوە، ئەمەش بۆ پاراستنی خەڵک لە فرتوفێڵی ئۆنلاین. گەڕانەوەی ئەم هونەرمەندە گەورەیە دەنگدانەوەیەکی فراوانی لە میدیا جیهانییەکاندا بەدەست هێناوە.