بەمەبەستی تاوتوێکردنی کارەکانی فێستیڤاڵی چەمچەماڵ بۆ فیلمی جینۆساید یەکەمین کۆبونەوەی تایبەت بە ئامادەکارییەکانی فێستیڤاڵی ناوبراو ئەنجامدرا.
کۆبونەوەکە بە ئامادەبوونی د.محسن ئەدیب بەڕێوەبەری گشتی رۆشنبیری و ھونەری سلێمانی، ئیدریس شەوکەت بەڕێوەبەری بەشی رۆشنبیری و ھونەری چەمچەماڵ، نیاز نووری نەقیبی سەندیکای ھونەرمەندانی کوردستان و بەشێک لە فەرمانبەرانی رۆشنبیری چەمچەماڵ ئەنجامدرا.
لە کۆبونەوەکە باس لە دواین ئامادەکارییەکانی فێستیڤاڵی چەمچەماڵ بۆ فیلمی جینۆساید کرا، کە چۆن بتوانرێت فێستیڤاڵێکی شایستە ئەنجامدرێت لە ئاست گەورەیی تاوانەکانی جینۆساید بێت و خزمەت بە دۆزی جینۆساد بکات.
وەک ھەوڵێک بۆ بە نێونەتەوەیی کردنی دۆزی جینۆسایدی دژ بە گەلی کوردستان و ھاندانی ھونەرمەندان و بەرھەمھێنەرانی بواری فیلم، فێستیڤاڵی چەمچەماڵ بۆ فیلمی جینۆساید ساڵانە لەلایەن بەشی رۆشنبیری و ھونەری چەمچەماڵەوە ئەنجامدەدرێت، تا ئێستا پێنج خولی لێ ئەنجامدراوە ئێستا لە ھەوڵی ئەنجامدانی خولێکی نوێی ئەم فێستیڤاڵەیە.