رێکخەرانی فێستیڤاڵی چەمچەماڵ بۆ فیلمی جینۆساید، خولێکی نوێ فێستیڤاڵەکەی راگەیاندووە و دەرگای پێشکەشکردنی بەرهەمەکان کراوەیە کە گوزارش لە ئازار و قوربانییەکانی مرۆڤایەتی دەکەن.
لیژنەی باڵای فێستیڤاڵ بە فەرمی دەرگای وەرگرتنی بەرهەمە سینەماییەکانی بۆ خولێکی نوێی فێستیڤاڵەکە واڵا کرد. ئەم فێستیڤاڵە کە ساڵانە لە شاری چەمچەماڵ بەڕێوەدەچێت، ئامانجی سەرەکی کۆکردنەوەی ئەو فیلمانەیە کە باس لە تاوانەکانی جینۆساید دەکەن، بەتایبەتی ئەو تاوانانەی دژ بە گەلی کورد و نەتەوە ستەملێکراوەکانی دیکە ئەنجامدراون.
گەلی کوردستان لە مێژووی نوێی خۆیدا ڕووبەڕووی زنجیرەیەک تاوانی جینۆساید بووەتەوە، لە شاڵاوەکانی ئەنفال و کیمیابارانی هەڵەبجەوە تا دەگاتە کۆمەڵکوژیی ئێزدییەکان. ئەم فێستیڤاڵە هەوڵێکە بۆ ئەوەی ئەم ئازارانە لە چوارچێوەی “بەڵگەنامەی سینەمایی”ـدا بپارێزرێن و ڕێگری بکرێت لە فەرامۆشکردنیان. سینەما لێرەدا تەنیا وەک هونەر نابینرێت، بەڵکو وەک ئامرازێکی دادپەروەری و ناساندنی دۆزی کورد بە جیهان سەیر دەکرێت.
بەڕێوەبەرایەتی فێستیڤاڵەکە داوا لە فیلمسازان و بەرهەمهێنەران دەکات کە بەرهەمەکانیان لە ڕێگەی ئیمەیڵی فەرمی ([email protected]) بنێرن. گرنگترین مەرجەکان بریتین لە:
- وادەی بەرهەمهێنان: پێویستە فیلمەکان لە نێوان ساڵانی 2020 بۆ 2026 بەرهەم هێنرابن.
- ماوەی فیلم: کورتە فیلمەکان نابێت لە ٢٠ خولەک تێپەڕ بکەن.
- ناوەرۆک: بابەتەکان دەبێت ڕاستەوخۆ پەیوەست بن بە تاوانەکانی جینۆساید.
- زمان: فیلمەکان دەبێت ژێرنووسی عەرەبی یان ئینگلیزییان هەبێت.
- دوایین وادە: 1ـی ئایاری 2026 دوا وادەیە بۆ وەرگرتنی فیلمەکان.
فێستیڤاڵەکە چەندین بەشی جیاواز لەخۆ دەگرێت، لەوانە: فیلمی فیچەر و فیلمی بڵندی کوردی، کورتە فیلم و فیلمی بڵندی دۆکیومێنتاری، فیلمی جینۆسایدی قوتابی (بۆ هاندانی نەوەی نوێ)، فیلمەکانی پێش ساڵی 2000 بەرهەم هێنراون و بەشی پەراوێز بۆ نمایشکردنی ئەو فیلمانەی لە دەرەوەی پێشبڕکێن.
ئەم جۆرە چالاکییانە یارمەتیدەرن لە بە بەڵگەکردنی مێژوو و ڕێگری دەکات لە شێواندنی ڕاستییەکان، لە ڕێگەی زمانە جیهانییەکەی سینەماوە، جینۆسایدی کورد بە گەلانی دیکە دەناسێنرێت و وەک جۆرێک لە چارەسەری دەروونی بە هونەر بۆ کەسوکاری قوربانیان دادەنرێت تا چیرۆکەکانیان ببینرێت و ببیسترێت.