ناوەندی هاوبەشی هەماهەنگیی قەیرانەکان لە وەزارەتی ناوخۆی حکومەتی هەرێمی کوردستان، هەواڵ و ڤیدیۆی چەند دەزگایەكی راگەیاندن سەبارەت بەبوونی حاڵەتی گەڕانەوەی ئاوارەكان لە كەمپێك لە زاخۆ، بەهۆی هەبوونی ترس كەمپەكە بەجێدەهێڵن رەت دەكاتەوە و دووپات لەوە دەكاتەوە، هەرێمی کوردستان هەمیشە وەکو لانکەی پێکەوەژیان و یەکتر قەبوڵ کردن دەمێنێتەوە.
ئەمڕۆ هەینی 9/8/2024، ناوەندی هاوبەشی هەماهەنگیی قەیرانەکان لە وەزارەتی ناوخۆی هەرێمی كوردستان، لە لاپەڕەی خۆی لە فەیسبووك، راگەیاندراوێكی بڵاو كردووەتەوە، تیایدا هاتووە: “لە دوای بڵاوبوونەوەی هەندێ دەنگۆ و هەواڵی نادروست لە چەند دەزگایەکی راگەیاندن سەبارەت بەبوونی حاڵەتی گەڕانەوەی ئاوارەکان لە کەمپێک لە ئیدارەی سەربەخۆی زاخۆ گوایە بەهۆی هەبوونی ترس کەمپەکە جێ دێڵن و دەگەڕێنەوە زێدی خۆیان لە شەنگال، ئێمە سەرجەم ئەو هەواڵە نادروست و دەنگۆیانە ڕەتدەکەینەوە.
وەزارەت دەڵێت: ئەوە دژ بە بنەماکانی ڕاست و دروستی گواستنەوەی زانیارییە لە کاری رۆژنامەوانی، لە هەمان کاتیش سەرجەم دانیشتوانی کەمپەکان دڵنیا دەکەینەوە کە هەرێمی کوردستان هەمیشە وەکو لانکەی پێکەوەژیان و یەکتر قەبوڵ کردن دەمێنێتەوە و ئامێزی گەورەی بۆ ئاوارەکان بە کراوەیی دێڵێتەوە تا ئەو کاتەی ئارەزوومەندانە و سەربەرزانە دەگەڕێنەوە زێدی خۆیان.
ئاماژە بەوەش كراوە کەمپەکان شوێنی خەڵکی سڤیل و لێقەوماون و بە باشی پارێزراون، بە هیچ شێوەیەک ڕێگا نادرێت سیمای پێکەوەژیان و یەکترقەبوڵکردن و لێبوردەیی ئەو شوێنانە بشێوێندرێت