گرووپی شانۆی “هەوار”، بە شانۆگەریی “سەلەمە” دەچێتە شاری سەڵاڵە لە عومان و وەک تاکە نوێنەری کوردستان و عێراق بەشداری لە فێستیڤاڵێکی نێودەوڵەتیدا دەکات.
دوای هەڵسەنگاندن بۆ 63 کاری شانۆیی لە سەرانسەری جیهانەوە لەلایەن لێژنەی تایبەتەوە، “سەلەمە” لە دەرهێنانی شانۆکار نەژاد نەجم و لە رۆڵبینینی هاوار فارس هەڵبژێردرا لە کۆی ئەو نۆ بەرهەمی بۆ فێستیڤاڵەکە دیاریکراون بۆ کێبڕکێ لەسەر خەڵاتەکانی یەکەمین فێستیڤاڵی نێودەوڵەتی شەوانی ئۆفێر بۆ دیۆدراما.
ئەم بەرهەمە شانۆییە تایبەتمەندی خۆی هەیە و بڕیارە بە هەردوو زمانی کوردی و ئینگلیزی پێشکەش بکرێت، ئەمەش دەرفەتێکی گەورەیە بۆ گەیاندنی پەیامی هونەری کوردی بە بینەرە جیاوازە نێودەوڵەتییەکان لەم مەڵبەندە کولتوورییەدا.
گرووپی شانۆی هەوار، شانازی خۆیان بەم نوێنەرایەتییە فەرمییە دەردەبڕن و ڕایدەگەیەنن کە بەردەوام هەوڵی بێوچان دەدەن بۆ پێشکەشکردنی باشترین نمایش. ئەوان بەڵێنی ئەوە دەدەن کە بە دەستکەوت و خەڵاتی شایستەوە لە شاری سەڵاڵەوە بگەڕێنەوە و سەرکەوتنێکی دیکە بۆ مێژووی خاک و نیشتمانەکەیان تۆمار بکەن.