ئەمڕۆ لە کتێبخانە و ماڵی “نازەنین حەیدەری” لە شاری هەولێر، پێشانگایەکی تایبەت و ناوازە لەژێر ناونیشانی (هونەر لە زبڵدان) بۆ کارە دەستییەکانی حەمە ستۆدیۆ کرایەوە.
پێشانگاکە بە ئامادەبوونی سیروان عوسمان، بەڕێوەبەری گشتیی ڕۆشنبیری و هونەری هەولێر لەگەڵ کۆمەڵێکی بەرچاو لە هونەرمەندان، نووسەران، ئەدیبان و ڕۆشنبیرانی شارەکە دەستی پێکرد.
تایبەتمەندیی پێشانگاکە لەوەدایە کە سەرجەم بەرهەمە نمایشکراوەکان لە کەرستەی کۆن و پاشماوە فڕێدراوەکان دروستکرابوون. هونەرمەند حەمە ستۆدیۆ بە دەستڕەنگینی و دیدگا ناوازەکەی خۆی، توانیبووی جارێکی تر ڕۆحێکی هونەری بەبەر ئەو کەرستانەدا بکاتەوە و سەرنجی ئامادەبووان و بینەران ڕابکێشێت.
کتێبخانەی حەیدەری وەک ماڵێکی کراوە بۆ هەمووان دەبینرێت، کە بەردەوام دەرگای واڵایە بۆ سازدانی کار و چالاکییە جۆراوجۆرە کولتووری، هونەری و ڕۆشنبیرییەکان لە شاری هەولێر.