وەزارەتی بازرگانیی عێراق، ئەمڕۆ ڕایگەیاند کە پڕۆسەی دابینکردن بابەتەکانی پسوولەی خۆراکی مانگانەی بۆ هاووڵاتیان دەستیپێکردووە. وەزارەت ئاماژەی بەوەش کردووە کە هیچ ڕێگر و گرفتێک لە پڕۆسەکانی دابینکردن و پارەدانی ئەلیکترۆنیدا نییە، هاوكات جەختی لە بوونی یەدەگی پێویستی خۆراک بۆ ماوەی سێ مانگ کردووەتەوە.
ئەحمەد عەلی عەبدولڕەزا، بەڕێوەبەری ڕاگەیاندنی کۆمپانیای گشتیی بازرگانیی کەرەستەی خۆراک ڕایگەیاند: “پڕۆسەی دابینکردنی کەرەستە خۆراکییەکان لە ڕۆژی شەممە ڕێکەوتی ٤ی تەممووزی٢٠٢٦ ەوە دەستیپێکردووە.” چاوەڕوانیش دەکرێت هاووڵاتیان پێش کۆتاییهاتنی ئەم هەفتەیە دەست بە وەرگرتنی بەشەخۆراکەکانیان بکەن.
پارەدانی ئەلیکترۆنی (POS): کۆمپانیاکە دووپاتی کردەوە کە پڕۆسەی بڕینی پسوولەکان و بەکارهێنانی ئامێرەکانی پارەدانی ئەلیکترۆنی بەبێ هیچ گرفتێکی تەکنیکی بەڕێوەدەچێت.
وەزارەت دڵنیایی دا کە کۆمپانیاکە خاوەنی یەدەگی ستراتیژیی کەرەستە خۆراکییەکانی سەبەتەی خۆراکە کە بەشی سێ مانگی تەواو دەکات.
گوتی: کۆمپانیاکە پلانێکی چاودێریی توندی لەژێر سەرپەرشتیی بەڕێوەبەری گشتی ئامادە کردووە، بە مەبەستی ئاسانکاری بۆ بریکارەکانی خۆراک (بریکاری فۆڕم) لە کاتی وەرگرتنی خۆراکەکاندا، و بەدواداچوونی گەیشتنی کەرەستەکان بە دەستی هاووڵاتیان لە کات و مۆڵەتی دیاریکراوی خۆیدا.
