بۆ داهات و خەرجیی ئەمساڵ، وەزارەتی دارایی چەند لیست و فۆڕمێك بۆ وەزارەت و فەرمانگەكان دەنێرێت و جەختیش دەكاتەوە، لە ماوەی 30 رۆژدا ئامادە بكرێت و پاشان لە رێگەی لێژنەیەك وەزارەتەكان بەجیا لەبارەی داهات و خەرجی گفتوگۆیان لەگەڵدا دەكرێت.
بەپێی نووسراوێكی وەزارەتی دارایی حكوومەتی هەرێمی كوردستان، كە بۆ وەزارەتەكان نێردراوە، داوای كردووە خەرجی و داهات ئامادە بكرێت.
ئاماژە بەوە كراوە، كە لەسەر داوای ئەنجوومەنی وەزیران، بە مەبەستی ئامادەكردنی داهات و خەرجیی خەمڵێندراوی حكوومەتی هەرێمی كوردستان بۆ ساڵی 2024، دەبێت لەسەر چەند فۆرم و لیستێك كار بكرێت و زانیارییەكان بدرێنەوە وەزارەتی دارایی.
ئەوەش خراوەتە ڕوو، كە وەزارەتەكان لەسەر ئاستی (فەسڵ و نەوع و مادە) بۆ خەرجییەكان و لەسەر ئاستی (نەوع و عەدەد و مادە) بۆ داهات كار بكرێت و فۆڕم و خشتەكان پڕ بكرێنەوە.
وەزارەتی دارایی روونی كردووەتەوە، كە هەندێك لە وەزارەتەكان پێویستە دوای ئامادەكردن و گفتوگۆكردنی خەرجی و داهات، لیست و فۆڕم و زانیارییەكان بۆ وەزارەتی دارایی رەوانە بكەن، بۆ پەسندكردنی.
جەختیش كراوەتەوە، كە دەبێـت فۆڕم و خشتەكان بەوردی ئامادە بكرێن، بەتایبەت ئەوانەی تایبەتن بە ژمارەی ئۆتۆمبێل و خانووی موڵك و كرێ و ژمارەی سوودمەندان لەو خەرجییانە.
هەروەها داواش كراوە، كە رەزامەندیی تایبەت بە قەرزی وەزارەتەكان لای فەرمانگەكان و قەرزاریی وەزارەتەكانیش بۆ لایەنەكان روون بكرێتەوە.
لەنێو خشتەكاندا پرسی مووچە و كڕینی پێداویستییەكان و پڕۆژەكانیش خراوەتە ڕوو.
وەزارەتی دارایی بە پێویستی دەزانێـت، بۆ ئەو پرسە لێژنەیەك لەسەر ئاستی وەزارەتەكان و دەستەكان پێكبهێندرێت بۆ، ئامادەكردنی سەرجەم داهات و خەرجییەكان و دوا مۆڵەتیش بۆ گەڕاندنەوەی ئەو فۆڕمانە بۆ وەزاەرتی دارایی 30 رۆژە.
دوای ئەوەی وەزارەتەكان خەرجی و داهاتیان ئامادە دەكەن، هەر وەزارەتێك بەپێی خشتەیەكی دیاریكراو، لەسەر پرسی ئامادەکردنی داتاکان گفتوگۆی لەگەڵ دەكرێت.
تێبینی ئەوەش دراوە، كە: “هەر وەزارەتێك، یان هەر دەستەیەك گفتوگۆی لەگەڵ ناكرێت، بەبێ ئامادەكردن و هێنانی داتا و زانیاریی داواكراو، هەروەها وەزارەت و دەستە بەرپرسن لە راستی و دروستیی زانیاریی داواكراو لە فۆڕمەكان.”
بەرپرسێكی وەزارەتی دارایی رایگەیاند: “پرسی داهات و بودجەی خەمڵێندراو گرنگیی زۆری پێ دەدرێت و فەرمانگەكان دەبێت ئەو بابەتە بەجدیی وەربگرن و لە وادەی دیاریكراودا خشتە و فۆرمەكان تەواو بكەن و رەوانەی بكەنەوە، دوای ڕەوانەكردنەوی بۆ ئێمەش، لەلایەن لێژنەیەكی تایبەت، لەسەر ئەو خەرجی و داهاتە خەمڵێنراوانە گفتوگۆ لەگەڵ وەزارەتەكان دەكرێت.”
روونیشی كردەوە: “لەسەر ئەو بنەمایەی، كە خەرجییەكان لەگەڵ داهاتەكان بگونجێن، پێشینەش بەو خەرجییانە بدرێت، كە زۆر پێویستن لە ڕاپەڕاندنی ئیش و كارەكان لە دامودەزگاكانی حكوومەتی هەرێمی كوردستان.
لای خۆیەوە د. محەمەد زراری، بەڕێوەبەری گشتی له دیوانی چاودێریی دارایی هەرێمی کوردستان، رایگەیاند: “ئامادەكردنی خەرجی و داهاتی وەزارەتەكان هەنگاوێگی گرنگ و پێویستە، هەم بۆ پلانی حكوومەت، هەمیش بۆ شەقافییەت و پرسی چاودێری و وردبینی.”
ئاماژەی بەوەش دا: “هەردوولا گرنگن، بەڵام گرنگتر رێكخستنی خەرجییەكانە، بەتابیەت خەرجیی مووچە و پێداویستییە گرنگەكانی فەرمانگە و دامەزراوەكان و خزمەتگوزارییەكانی ئاو و كارەبا و پڕۆژەكان.”
شوان بەرزنجی