وەزارەتی نەوتی عێراق رایگەیاند: هەناردەی نەوت لە هەرێمی کوردستانەوە لەڕێگەی بۆڕیی عێراق-تورکیا دەستیپێکرد.
وەزارەتی نەوتی عێراق له راگەیەندراوێکدا دەڵێت: “لە جێبەجێکردنی رێنماییەکانی سەرۆک وەزیرانی عێراق و بە سەرپەرشتی راستەوخۆی جێگری سەرۆک وەزیران بۆ کاروباری وزە و وەزیری نەوت، حەیان عەبدولغەنی و بە هاوکارییەکی نزیک لەگەڵ وەزارەتی سامانە سروشتییەکان لە هەرێمی کوردستان، سەرلەبەیانی ئەمڕۆ هەناردەکردنی نەوتی خاو لە هەرێمەوە لەڕێگەی بۆڕیی عێراق- تورکیاوە دەستیپێکردەوە.
وەزارەتی نەوت راشیگەیاند: “پڕۆسەکه لە کاتژمێر ٦:٠٠ی بەیانی بەخێرایی و نەرمییەکی تەواو دەستی پێکرد، بەبێ هیچ کێشەیەکی تەکنیکی بەرچاو. ئەمەش رەنگدانەوەی سەرکەوتنی هەوڵە هاوبەشەکانی نێوان حکومەتی فیدراڵی و حکومەتی هەرێمە لە گەیشتن بەو بڕگە گرنگە.”
وەزارەتی نەوت روونی کردەوه: “ئەم پێشهاتە رەنگدانەوەی هەنگاوێکی بەرچاوه بەرەو بەهێزکردنی بەڕێوەبردنی سامانە نیشتمانییەکان بە گیانی هاوبەشی و هەماهەنگی بەرز، بەشداریکردن لە دەستەبەرکردنی بەردەوامیی هەناردەکردنی نەوت و پاڵپشتیکردنی ئابووریی نیشتمانی.”