نرخی دۆلاری ئازاد لە بازاڕی دراوی ئێراندا ڕۆژی چوارشەممە، ٢٤ی کانوونی یەکەم، بە شێوەیەکی بەرچاو بەرزبووەوە و گەیشتە ١٣٦ هەزار تمەن. ئەم بەرزبوونەوە خێرایە لە کاتێکدایە بەهای ڕیاڵی ئێرانی بە شێوەیەکی بێوێنە لە دابەزیندایە.
بەپێی میدیا ناوخۆیییەکان، نرخی دۆلار سەرەڕای ئەوەی لە سەرەتای کردنەوەی بازاڕی دراودا بە نزمی دەستی پێ کرد، بەڵام ماوەیەکی کەم دواتر دەستی بە بەرزبوونەوە کرد. نرخی دۆلار بە ١٢٤٠ تمەن بەرزبووەوە و گەیشتە ١٣٥ هەزار و ٩٩٠ تمەن. هاوکات، نرخی یۆرۆش گەیشتە ١٦٠ هەزار و ٣٧٠ تمەن.
ئابووریناسان ئەم بازدانەی نوێی نرخی دراو بە ئەنجامی چەندین هۆکاری پێکهاتەیی و سیاسیی هاوکات دەزانن. بەردەوامبوونی هەڵاوسانی درێژخایەن لە سەرووی ٤٠%، کەمیی زۆری بودجەی حکوومەت، کەمبوونەوەی بەردەوامی داهاتەکانی دراوی بیانیی جێگیر، و سنووردارکردنە بانکییە سەختەکان کە بەهۆی گەمارۆ نێودەوڵەتییەکانەوە دروست بوون، لەو هۆکارانەن کە یارمەتیدەرن بۆ ئەم بازدانە.
بەپێی داتاکانی سندووقی نێودەوڵەتیی دراو و بانکی جیهانی، بەهای ڕاستەقینەی ڕیاڵی ئێران لە ماوەی دە ساڵی ڕابردوودا زیاتر لە ٩٠% لاواز بووە و ئێران یەکێکە لەو وڵاتانەی بەرزترین ڕێژەی دابەزینی بەهای دراوی نیشتمانی لە جیهاندا ئەزموون کردووە.
هاوکات، توندبوونەوەی نادڵنیایی سیاسی، کەمبوونەوەی متمانەی گشتی بە سیاسەتەکانی دراوی حکوومەت و زیادبوونی خواست لەسەر دراوی بیانی و زێڕ، بەتایبەتی لە مانگەکانی ئەم دواییەدا، فشارێکی زیادەی خستووەتە سەر بازاڕی ئازادی دراو. ئەم بازاڕە بەهۆی جیاوازیی زۆری لەگەڵ نرخە فەرمییەکاندا، کردەیی گۆڕاوێکی سەرەکییە بۆ پێشبینییەکانی هەڵاوسان لە ئابووریی ئێراندا. سەرۆک کۆماری ئێران مەسعوود پزیشکیان پێشتر عەجزی بودجەی بە هۆکارێک بۆ بەرزبوونەوەی هەڵاوسان زانیبوو.