ئەمڕۆ دووشەممە، 11-5-2026، نرخی گاز لە بازاڕەکانی ئەوروپا ڕووی لە بەرزبوونەوە کرد و گەیشتە 545 دۆلار بۆ هەر هەزار مەتر سێجایەک، ئەمەش بەهۆی دۆخی نگەرووی هورمزەوەیە.
لەسەرەتای کردنەوەی بازاڕدا، گرێبەستە ئاییندەییەکانی مانگی حوزەیران لە ناوەندی (TTF)ی هۆڵەندی بە 550.20 دۆلار دەستیان پێکرد،
دواتر نرخەکە لە دەوروبەری 544.20 دۆلار جێگیر بوو، کە بەراورد بە نرخی داخرانی ڕۆژی پێشوو 536.50 دۆلار بوو.
بەپێی ئامارەکانی ئاژانسی “نۆڤۆستی”، نرخی گاز لە مانگی ئاداری ڕابردوودا بە ڕێژەی 60% بەراورد بە مانگی شوبات بەرزبووەوە، ئەوەش بەهۆی پەرەسەندنی ململانێکان لە ڕۆژهەڵاتی ناوەڕاست کە تێیدا نرخەکان بۆ یەکەمجار لە شوباتی 2023ـەوە، ئاستی 600 دۆلاریان تێپەڕاند.
لە 19ی ئاداری ڕابردوو، نرخەکان گەیشتنە 853.7 دۆلار، ئەوەش دوای ئەوەی “سەعد ئەلکەعبی” ڕایگەیاند کە 2 هێڵی بەرهەمهێنانی کۆمپانیای وزەی قەتەر زیانیان پێگەیشتووە.