بانكی جیهان كە بەشداری پڕۆژەی (هەژماری من)ە، مووچەخۆران و هاوبەشان لەبارەی هەوڵەکانی فێڵکردن و دزیی ئەلیکترۆنی ئاگادار دەكاتەوە.
لە راگەیاندراوێكی بانكەدا هاتووە: “پاراستنی زانیارییە بانکییەکانت، واتە پاراستنی سەرمایەکەت. بانکی جیهان و کارمەندەکانی، لە ژێر هیچ بارودۆخێکدا داوای ئەو زانیارییانە ناكەن.”
لەبارەی ئەو زانیارییانەی داوا ناكرێن، پێكهاتوون لە :
*وشەی نهێنی (Password)
*کۆدی دڵنیایی (OTP)
*ژمارەی نهێنیی کارت (PIN)
*وردەکارییەکانی کارت و هەژمار: ژمارەی کارت، ڕێکەوتی بەسەرچوون، یان هەر زانیارییەکی تری هەستیار.
جەختی كردووەتەوە: “ئاگاداربە، فێڵبازەکان ڕەنگە لە ڕێگەی پەیوەندی تەلەفۆنی، واتسئاپ، یان لینکە گوماناوییەکانەوە پەیوەندیت پێوە بکەن و وا خۆیان نیشان بدەن کە لە لایەن بانکی جیهانەوە پەیوەندیت پێوە دەکەن. خۆت بەدوور بگرە لە کلیک کردن لەسەر هەر لینکێکی نەناسراو کە بۆت دێت.”
بانكە بەشدارەكەی پڕۆژەی (هەژماری من) راشیگەیاندووە: “بۆ ئەوەی پارێزراو بیت، زانیارییەکانت لەگەڵ هیچ کەسێکدا هاوبەش مەکە، و هەمیشە دڵنیابەرەوە کە تەنها لە ڕێگەی پەیج و ژمارە فەرمییەکانی بانک مامەڵە دەکەیت.”