ئۆلیانا ئۆراسۆڤا، پزیشکی پسپۆڕی نەخۆشییەکانی دڵ، هۆشداری دەدات لەوەی کە هەندێک خۆراکی باو و ڕۆژانە دەبنە هۆی دروستکردنی مەترسیی ڕاستەوخۆ بۆ سەر تەندروستیی دڵ و بۆرییەکانی خوێن. ئەو جەخت دەکاتەوە کە ناسینی ئەم خۆراکانە و کەمکردنەوەی خواردنیان، هەنگاوێکی سەرەکییە بۆ خۆپاراستن لە نەخۆشییەکانی دڵ.
ئەم پزیشکە ڕوونی دەکاتەوە کە “چەورییە گۆڕاوەکان” (Trans fats) کە لە کەرەی ڕووەکی، شیرینی و کێکە پیشەسازییەکان، خواردنە خێراکان و کەرەستە سووکەکاندا (Snacks) هەن، لە مەترسیدارترین پێکهاتە خۆراکییەکانن؛ چونکە ئاستی کۆلیسترۆڵی خراپ بەرز دەکەنەوە و کۆلیسترۆڵی باش دادەبەزێنن، ئەمەش ڕێگا بۆ ڕەقبوونی دەمارەکان خۆش دەکات.
ئۆراسۆڤا ئاماژە بەوەش دەکات کە زیادەڕۆیی لە خواردنی شەکر و شیرینەمەنییەکان دەبێتە هۆی بەرزبوونەوەی خێرای ڕێژەی گلوکۆز لە خوێندا، کە بە تێپەڕبوونی کات ئەگەری تووشبوون بە قەڵەوی و شەکرەی جۆری 2 زیاتر دەکات و باری سەر دڵ قورس دەکات.
هەروەها باسی لەوە کردووە کە زۆرخواردنی خوێ دەبێتە هۆی قەتیسبوونی شلە لە جەستەدا و بەرزبوونەوەی پەستانی خوێن، کە ئەمانەش دوو هۆکاری سەرەکین بۆ نەخۆشییەکانی دڵ. لە لایەکی دیکەشەوە، گۆشتە دەستکاریکراوەکان وەک سۆسج و هۆت دۆگ بەهۆی هەبوونی ڕێژەیەکی زۆری خوێ، چەوریی تێر و ماددەی پارێزەر، لە لیستی خۆراکە ناتەندروستەکاندان.
لە کۆتاییدا، ئەم پزیشکە ڕێنمایی دەدات کە بەرهەمە شیرەمەنییە پڕچەورییەکان بەهۆی ڕێژەی زۆری چەوریی تێر تێیاندا کەم بکرێنەوە، هەروەها خواردنە خێراکان (Fast Food) بەهۆی تێکەڵبوونی چەوری، شەکر و خوێ، بەستراونەتەوە بە زیادبوونی کێش، بەرزبوونەوەی کۆلیسترۆڵ و تێکچوونی مێتابۆلیزم (سوتانی وزە).
