توێژینەوەیەکی نوێ لە ئەمریکا ئاشکرای دەکات، وەرزش مێشک خاودەکاتەوە و یارمەتیی پاراستنی تەندروستیی دڵ و لوولەکانی خوێنیش دەدات.
توێژینەوەکە لە نەخۆشخانەی ماساچوسێتس لە ئەمریکا کراوە و دەرکەوتووە، هەرچەندە کە زانراوە وەرزشکردن سوودی زۆری دەبێت بۆ تەندروست مانەوەی دڵ، بەڵام ئەمجارە دەرکەوتووە کە کاریگەریی لەسەر تواناکانی مێشکیش دەکات.
پسپۆڕان دەڵێن، چالاکیی جەستەیی بە رێژەیەکی بەرچاو گوشاری دەروونی کەمدەکاتەوە و رێگری دەکات لە خەمۆکی، دوودڵی و لاوازبوونی توانای بڕیاردان.
د. ئەحمەد تەوەکول، سەرپەرشتیاری توێژینەوەکە دەڵێت: ”وەرزش تەندروستیی دڵ دەپارێزێت و رێگری دەکات لە تووشبوون بە جەڵتەی دڵ، هەروەها مەترسیی تووشبوون بە پاشهاتی مەترسیدار لەو کەسانەی تووشی خەمۆکی بوون کەمدەکاتەوە”.
د. ئەحمەد تەوەکول دەشڵێت، پێویستە پزیشکەکان پەیوەندیی نێوان دڵ و مێشک بۆ نەخۆشەکانیان روونبکەنەوە و لە سوودەکانی چالاکیی جەستەیی دڵنیایان بکەنەوە.