وەزارەتی پەروەردەی عێراق ئامادەکارییەکانی بۆ دەستپێکردنی ساڵی نوێی خوێندنی ۲۰۲٦ – ۲۰۲۷ ڕاگەیاند و ئاشکرای کرد کە زیاتر لە ۱۲ ملیۆن قوتابی ڕوودەکەنە ناوەندەکانی خوێندن.
ئامادەکارییەکان و ژمارەی خوێندکاران:
کەریم سەید، گوتەبێژی وەزارەتی پەروەردە ڕایگەیاند: وەزارەتی پەروەردە دوای ئامادەکردنی زنجیرەیەک پلان و ڕێکار و هەماهەنگیی پێشوەختە بۆ دیاریکردنی کاتەکانی دەستپێکردن، بە تەواوی ئامادەیە بۆ دەستپێکردنی ساڵی نوێی خوێندنی ۲۰۲٦ – ۲۰۲۷.
ئاماژەی بەوەش کرد کە دەستەی مامۆستایان و مامۆستایانی بەخشەر لە یەکی ئەیلوولەوە دەستیان بە دەوامی فەرمی کردووە.
دیاریی کرد کە زیاتر لە ۱۲,۰۰۰,۰۰۰ قوتابی لە قۆناغەکانی سەرەتایی، ناوەندی، ئامادەیی، پەیمانگاکان و قوتابخانە ناحکومییەکان پەیوەندی بە خوێندنەوە دەکەن، جگە لە تۆمارکردنی زیاتر لە ملیۆنێک و ۲۰۰ هەزار قوتابی لە پۆلی یەکەمی سەرەتایی.
ئامادەکاریی لۆجستیکی و کۆبوونەوەکانی وەزارەت:
وتەبێژی وەزارەت جەختی کردەوە کە کار دەکرێت بۆ ئامادەکردنی بینای قوتابخانەکان، پێداویستییە لۆجستیکییەکان، کارەکانی تۆمارکردنی قوتابیان، ئەنجامدانی تاقیکردنەوەکانی خولی دووەم و سەرجەم کارە پەیوەندیدارەکانی ساڵی نوێی خوێندن.
باسی لەوەش کرد کە عەبدولکەریم عەبتان ئەلجبوری، وەزیری پەروەردە، کۆبوونەوەی چڕی لەگەڵ کادیرانی باڵای وەزارەت ئەنجامداوە بۆ تاوتوێکردنی ئامادەکارییەکان؛ سەرجەم بەشەکان لە ئامادەباشیدان بۆ دابینکردنی پەرتووکەکانی بەرهەمهاتوو و پەرتووکەکانی مەنهەج، لەگەڵ ڕێکخستنەوەی میلاکات و ئامادەکردنی بیناکان.
ئاڵەنگارییە داراییەکان:
سەید ڕوونی کردەوە کە لەگەڵ بەڕێوەبەرایەتییە گشتییەکانی پەروەردەدا کار دەکرێت بۆ ڕەواندنەوەی کێشە و ئاستەنگەکان، هەرچەندە چارەسەرکردنی ڕیشەییی دۆخەکە پێویستی بە تەرخانکردنی بودجەی زیاتر و پڕۆژەی دارایی بەرفراوانتر هەیە.