ئەمڕۆ دووشەممە، 28ـی ئەیلوولی 2026، وەزارەتی دادی عێراق رایگەیاند، زیاتر لە 80 پارچە شوێنەواری بەقاچاخبردراوی گەڕاندووەتەوە بۆ وڵات.
وەزارەتی داد لە راگەیەندراوێکدا روونیکردەوە، هەوڵە یاساییە بەردەوامەکانی وەزارەت بە رێنوێنی و بەدواداچوونی خالید شوانی، وەزیری داد، بووە هۆی گەڕاندنەوەی زیاتر لە 80 پارچە شوێنەوار و کاری هونەریی عێراقی. ئەم هەنگاوە لە چوارچێوەی هەوڵەکانی وەزارەتە بۆ پاراستنی میراتی شارستانی و کولتووریی عێراق و گەڕاندنەوەی موڵکە شوێنەوارییەکان بۆ نیشتمان.
بەڕێوەبەرایەتیی بەڕێوەبردنی سکاڵاکانی دەرەوە، لە رێگەی بەشی گەڕاندنەوەی شوێنەوار و پارەکانەوە، بەردەوامە لە بەدواداچوون بۆ دۆسیە و داواکارییە پەیوەندیدارەکان بە گەڕاندنەوەی شوێنەوارەکان. ئەو بەڕێوەبەرایەتییە کار دەکات بۆ گرتنەبەری رێوشوێنە یاساییە پێویستەکان بەمەبەستی گەڕاندنەوەی ئەو پارچە شوێنەوارانەی بەهۆی هەڵکۆڵینی هەڕەمەکییەوە دەرکراون، یان رووبەڕووی دزی، بەقاچاخبردن و مامەڵەکردن لە دەرەوەی عێراق بوونەتەوە.
پرۆسەی گەڕاندنەوەی ئەو پارچانە بە هەماهەنگی لەگەڵ وەزارەتی دەرەوە، باڵیۆزخانەی عێراق لە واشنتن و لایەنە پەیوەندیدارەکان بەڕێوەچووە. ئەم هەوڵانە لە چوارچێوەی بەرنامەی وەزارەتی داددایە بۆ بەدواداچوونی دۆسیەکانی گەڕاندنەوەی شوێنەوار و پارە عێراقییەکان و بەهێزکردنی رێوشوێنە یاساییەکانی پاراستنی میراتی شارستانی و کولتووریی عێراق، بە جۆرێک خزمەت بە پاراستنی میراتی وڵاتی دوو رووبارەکە و گەڕاندنەوەی موڵکە مێژووییەکان بکات بەپێی چوارچێوە یاساییە پەسەندکراوەکان.