دەستەی نیشتمانی بۆ چاودێریی ئەتۆمی و تیشك و بایۆلۆجی عێراق ئاشكرای دەكات، چاودێریی سنوورەكان دەكەن بۆ هەر حاڵەتێكی پەیوەست بە تیشكدەرەوە ئەتۆمییەكان و جەختیش دەكاتەوە، لە ئەنجامی بۆردومانەکانی ئەمریکا بۆ سەر دامەزراوە ئۆتۆمییەکانی ئێران هیچ حاڵەتی تیشکدەر نەبووە.
فازل حاوی مەزبان، سەرۆکی دەستەی نیشتمانی بۆ چاودێریی ئەتۆمی و تیشك و بایۆلۆجی عێراق، لە بەیاننامەیەکدا ڕایگەیاند: “لە چوارچێوەی ئەو ئەرک و بەرپرسیاریەتیەی کە بە ژووری ئۆپراسیۆنی ناوەندی بۆ حاڵەتە نائاساییە تیشکییەکان و ئەتۆمییەکان سپێردراوە لە ئامادەکاری و ڕووبەڕووبوونەوە و وەڵامدانەوەی حاڵەتە نائاساییە ئەتۆمییەکان و تیشکدانەوەکان و لە یەکەم ڕۆژی دەستپێکردنی هێرشە ئاسمانییەکانی ئیسرائیل بۆ سەر ئێران لە 13ی حوزەیرانی 2025، ڕێوشوێنی گونجاو گیراوەتەبەر بۆ ڕووبەڕووبوونەوە و وەڵامدانەوەی ئەم ڕووداوانەی کە دەبنە هۆی کاریگەری ژینگەیی و تیشکدانەوە.”
سەرۆکی دەستەکە ئاماژەی بەوەشداوە: “بە پشتبەستن بە پێشهاتەکانی دۆخەکە لە بەیانی ڕۆژی یەکشەممە 22ی حوزەیرانی 2025 و لە ئەنجامی ئەو هێرشە ئاسمانیانەی ئەمریکا بۆ سەر دامەزراوە ئەتۆمییەکانی ئێران ئەنجامیان دا، هەروەها لە ڕێگەی چاودێریکردنی سیستمی چاودێری تیشک و ئاگادارکردنەوەی پێشوەختە و پێوانەکردنی تیشکی پاشخان لە دەروازە سنوورییەکاندا، هیچ حاڵەتێکی پیسبوونی تیشکدەرەوەی بەرچاو دەستنیشان نەکراوە.”
جەختی كردەوە، لەسەرەتای شەڕەكە تاوەكوو ئێستا بەردەوام شیكردنەوە بۆ هەوا و تیشكەكان دەكەن، بەتایبەت لە ناوچە سنوورییەكاندا.
ویلایەتە یەکگرتووەکانی ئەمریکا بەرەبەیانی ئەمڕۆ یەكشەممە 22ی حوزەیرانی 2025، هێرشێکی سەربازیی خێرا و وردی لە دژی دامەزراوە ناوەکییەکانی (فۆردۆ، نەتەنز و ئەسفەهان)ی لە ئێران ئەنجام دا.