محەمەد شیاع سوودانی، سەرۆک وەزیرانی عێراق، دووپاتیکردەوە عێراق هەرگیز لە پێگەی لاوازیدا نەبووە و نابێت. پێشتر رووبەڕووی تیرۆر بووەتەوە و شکستی پێهێناوە، بە سەرکەوتوویی هەڕەشەکانی بەرپەرچ داوەتەوە و گەلەکەی لە کارەساتەکانی شەڕ رزگار کردووە.
لە میانەی کۆبوونەوەی ئەنجومەنی وەزیرانی عێراق، سوودانی رایگەیاند، “رێگه بە هیچ کارێکی ناوخۆیی و دەرەکی نادەین کە زیان بە ئاسایش بگەیەنێت و بەهێزەوە رووبەڕووی دەبینەوە”. ئاماژەی بەوەشکرد، ” مامەڵەمان لەگەڵ رووداوەکان کردووە بەشێوەیەک بەرژەوەندییەکانی گەلی عێراق لە پێشینەی کارەکاندا بێت.”
سوودانی گوتی، “ئێمە بە ئیدانەکردن و رەتکردنەوەی دەستدرێژیی ئیسرائیل بۆ سەر ئێران و هەوڵی بەئەنقەست بۆ تێکدانی ئاسایش و ئاشتی ناوچەکە، هەڵوێستی عێراقمان دووپات کردووەتەوە”.
راشیگەیاند، “ئیسرائیل بە بیانووی شکستخواردوو بۆ فراوانکردنی بازنەی ململانێکان کەڵک وەردەگرێت و ریشەی کێشەکە لە پشتگوێخستنی مافی فەڵەستینییەکانە. هیوادارین رێککەوتنی ئاگربەست بەهێز و پتەو بێت.”
ئاشکراشی کرد، “بنکە سەربازییەکانی عێراق لەلایەن درۆنی بۆمبڕێژکراو کەوتە بەر هێرشێکی خیانەتکارانە و ترسنۆکانە، ئەمەش زیانی بە سیستەمی رادار لە بنکەی تاجی و ئیمام عەلی لە زیقار گەیاند. هێزە چەکدارەکان و بەرگرییە ئاسمانییەکانمان بەخێرایی وەڵامی ئەو هێرشانەی دایەوە کە بنکەکانی دیکەیان کردە ئامانج، فڕۆکە هێرشبەرەکانیان خستە خوارەوە. لێکۆڵینەوەکان بۆ دیاریکردنی رەهەندەکانی ئەم هێرشه و دۆخەکە دەکرێت.”
سوودانی جەختی کردەوە، “حکومەت پلانێکی تۆکمەی بۆ دەستەبەرکردنی سیستەمی بەرگری ئاسمانی داڕشتووە، هەروەها کۆمەڵێک گرێبەست و پڕۆژە هەیە بۆ تەواوکردنی پڕچەککردنی سیستەمی بەرگری ئاسمانی بەپێی دوایین تایبەتمەندییەکان”.