عەبدولئەمیر شەمەری، وەزیری ناوخۆی عێراق هەڵوەشاندنەوەی تۆڕێکی نێودەوڵەتیی بازرگانیکردن بە ماددە هۆشبەرەکانی کە لە سووریا کاری دەکرد، راگەیاند.
شەمەری گوتی، تۆڕێکی بازرگانیکردن بە ماددە هۆشبەرەکان دەستگیرکراون کە ملیۆنێک و 350 هەزار حەبی هۆشبەریان لە ناوخۆی سوریادا پێبووە.
ئاماژەی بەوەشکرد، دەستگیرکردنی ئەم تۆڕە بە هاوکاری لەگەڵ دەسەڵاتدارانی سووریا بووه.
وەزارەتی ناوخۆی عێراقیش لە راگەیەندراوێکدا ئاماژە بەوە کرد، مەفرەزێکی تایبەتمەند لە بەڕێوەبەرایەتی گشتی کۆنترۆڵکردنی ماددە هۆشبەرەکان، بە پشتبەستن بە هەواڵگری و سەرچاوەی ورد لەناو تۆڕەکانی بازرگانیکردن بە ماددە هۆشبەرەکان و بە هاوکارییەکی نزیک لەگەڵ بەڕێوەبەرایەتی کۆنترۆڵکردنی ماددە هۆشبەرەکانی سووریا، بۆ ئەنجامدانی ئەرکێکی گرنگی ئەمنی لە دیمەشق ئۆپەراسیۆنێکی دەستیپێکردووە.