سەرەڕای بانگهێشتی سەرۆکایەتیی پەرلەمانی عێراق بۆ پەرلەمانتاران بۆ بەجێگەیاندنی بەرپرسیارێتییان، ئەمڕۆ جارێکی دیکه زۆرینەی ئەندامانی پەرلەمانی عێراق ئامادەی دانیشتن نەبوون و بەهۆیەوه رێژەی یاسایی تەواو نەکرا و بۆ جاری سێیەم دانیشتنی پەرلەمان دواخرا.
بەشی ڕاگەیاندنی پەرلەمانی عێراق لە ڕاگەیەندراوێکدا روونی کردەوه، “بەهۆی تەواونەبوونی رێژەی یاسایی ئەنجومەنی نوێنەران دانیشتنەکەی دواخست” و سەرچاوەیەکی پەرلەمانیش ئاماژەی بەوەکردووە، دانیشتنەکە بۆ هەفتەی داهاتوو دواخراوە.
محەمەد عەنوز، ئەندامی لیژنەی یاسایی لە ئەنجومەنی نوێنەرانی عێراق، ڕەخنەی لە بەردەوامی پەکخستنی دانیشتنەکانی پەرلەمان گرت و رایگەیاند، ئەمە پشتگوێخستنی روون و ئاشکرایە بۆ بەرپرسیارێتی نوێنەران بەرامبەر بە خەڵک.
کۆبوونەوەیەکی سەرۆکایەتی لە ئەنجومەنی نوێنەران، کە دوێنێ سێشەممە بەڕێوەچوو، جەختی لەسەر گرنگی بەشداریکردنی سەرۆکی فراکسیۆنەکانی پەرلەمان و ئەندامانی ئەنجومەن لە دانیشتنەکانی داهاتوودا کردەوە بۆ بەشداریکردنی کاریگەر لە دەرکردنی یاسای گرنگ، ئەمەش بە “ئەرکێکی نیشتمانیی دەزانێت کە ناتوانرێت دوابخرێت”.
پەرلەمانی عێراق نەیتوانی دانیشتنی ئاسایی خۆی لە رۆژانی سێشەممە و دووشەممەی رابردوو ئەنجام بدات بەهۆی تەواونەبوونی رێژەی یاسایی. کارنامەکە 11 بڕگە لەخۆگرتبوو، کە حەوت بڕگە تەرخانکرابوون بۆ دەنگدان لەسەر رەشنووسی یاساکان و یاسایەکی پێشنیارکراو.