محەمەد شیاع سوودانی، سەرۆک وەزیران و فەرماندەی گشتیی هێزە چەکدارەکان، ئەمڕۆ سەرپەرشتی کۆبوونەوەیەکی نائاسایی ئەنجومەنی وەزاری بۆ ئاسایشی نیشتمانی کرد. لە کۆبوونەوەکەدا بارودۆخی گشتی وڵات لە سایەی پەرەسەندنە ئەمنییە مەترسیدارەکانی ناوچەکە تاوتوێ کرا.
بڕیار و ڕێنماییە سەرەکییەکانی سوودانی:
• پاراستنی سەقامگیری: فەرماندەی گشتی فەرمانی بە هەموو دەزگا ئەمنییەکان کرد کە ڕووبەڕووی هەر کارێک ببنەوە کە زیان بە ئاسایش و سەقامگیری وڵات دەگەیەنێت.
• دوورخستنەوەی عێراق لە ململانێ: جەختی کردەوە کە ڕێگە بە هیچ لایەن و هێزێک نادرێت کارێک بکات کە ببێتە هۆی تێوەگلانی عێراق لە ململانێ و شەڕەکانی ناوچەکە.
• پاراستنی نێردە دیپلۆماسییەکان: حکومەت پابەندبوونی خۆی دووپاتکردەوە بە پاراستنی نێردە دیپلۆماسییەکان و بنکە و دامەزراوە هەستیارەکان و ڕێگری لە هەر هێرشێک بۆ سەریان.
• مافی خۆپێشاندان: ئەنجومەن ئاماژەی بەوە کرد کە دەوڵەت پارێزەری مافی ڕادەربڕین و گردبوونەوەی ئاشتییانەیە بەپێی دەستوور، بەڵام ڕێگە بە تێکدانی موڵک و ماڵی گشتی و تایبەت نادات.
بڕیارە سەربازی و ئەمنییەکان:
ئەنجومەن دووپاتی کردەوە کە بڕیاری ئاشتی، جەنگ، و هەر جوڵەیەکی سەربازی تەنها لە دەسەڵاتی دەوڵەتدایە و لە ڕێگەی دامەزراوە دەستوورییەکانەوە دەبێت.
ئاسایشی خۆراک و وزە:
لە کۆبوونەوەکەدا وەزیرانی نەوت، کارەبا و بازرگانی ئامادە بوون بۆ تاوتوێکردنی کاریگەرییە ئابوورییەکانی شەڕ. باس لەمانە کرا:
1. دابینکردنی سوتەمەنی و وزەی کارەبا لە کاتی قەیراندا.
2. گەرەنتی کردنی ئاسایشی خۆراک بۆ هاوڵاتیان.
3. گرتنەبەری ڕێکاری پێویست بۆ بەرەنگاربوونەوەی هەر تهنگژهیهكی ئابووری کە لە ئەنجامی فراوانبوونی شەڕ لە ناوچەکەدا دروست بێت.