سەرچاوەیەکی ئەمنی لە نەینەوا، ئێوارەی ئەمڕۆ ڕایگەیاند، دووەم هێرشی ئاسمانی کە پێگەیەکی حەشدی شەعبی لە قەزای تەلەعفەر کردە ئامانج، بووەتە هۆی کوژرانی ژمارەیەک ئەندامی حەشدی شەعبی.
سەرچاوەکە بە شەفەق نیوزی ڕاگەیاندووە: “دووەم بۆردومانی ئاسمانی کە بارەگای لیوای حوسێن (لیوای ٥٣)ی لە یەکێک لە گوندەکانی سەر بە قەزای تەلەعفەر کردە ئامانج، بووەتە هۆی کوژرانی فەرماندەی فەوجی مەغاویر و سێ ئەندامی تری حەشدی شەعبی.”
تیمەکانی بەرگریی شارستانی، بەڵگەی تاوان و شارەزایانی تەقەمەنی دەستیان بە ڕێکارەکانیان لە شوێنی ڕووداوەکە کردووە.
لێکۆڵینەوەکان بەردەوامن بۆ زانینی وردەکارییەکانی هێرشەکە و دەستنیشانکردنی ئەو لایەنەی هێرشەکەی ئەنجامداوە.
سەرچاوەکە ئاماژەی بەوە کردووە کە هەمان بارەگا ئێوارەی ئەمڕۆ دووجار بۆردومان کراوە، ئەمەش پەرەسەندنێکی ئەمنی بەرچاوە لە ناوچەکانی ڕۆژئاوای نەینەوا.
