بەپێی نوێترین ڕیزبەندیی گۆڤاری “CEOWORLD” بۆ ساڵی 2026، عێراق وەک یەکێک لەو وڵاتانە دیاریکراوە کە بەرزترین ڕێژەی قەڵەوییان تێدایە لەسەر ئاستی جیهان و وڵاتانی عەرەبی.
عێراق لە پلەی 172یەم دایە لە کۆی 197 وڵات، بەجۆرێک ڕێژەی گشتیی قەڵەوی لە وڵاتەکەدا گەیشتووەتە 39.28%.
ڕاپۆرتەکە ئاماژە بەوە دەکات کە ڕێژەی قەڵەوی لەنێوان پیاوانی عێراقدا 30.43%یە، بەڵام ئەم ڕێژەیە لەنێوان ژناندا بە شێوەیەکی بەرچاو بەرز دەبێتەوە و دەگاتە 48.13%. ئەمەش عێراق دەخاتە ڕیزبەندی وڵاتە هەرە قەڵەوەکانی ناوچەکە.
بەپێی ڕیزبەندییەکە، ڕێژەی قەڵەوی لە وڵاتانی تری ناوچەکە بەم شێوەیەیە:
کوەیت: 57.85% لە پلەی 187ی جیهانیدایە و قەڵەوترین وڵاتی عەرەبییە.
قەتەر: 57.33%
میسر: 50.14%
سعوودیە: 45.56%
بەحرەین: 38.96%
لیبیا: 38.24%
ئوردن: 36.56%
ئیمارات: 34.81%
لە بەرامبەردا، وڵاتی ڤێتنام بە کەمترین ڕێژەی قەڵەوی لە جیهاندا دەستنیشان کراوە کە تەنها 1.72%یە. سەبارەت بە ئەمریکا، ڕێژەی قەڵەوی تێیدا گەیشتووەتە 51.85%، لەکاتێکدا “ساموای ئەمریکی” بە ڕێژەی 75.29% لە کۆتا پلەی ڕیزبەندییەکەدایە وەک قەڵەوترین ناوچە.
هۆکارەکان و مەترسییەکان
ڕاپۆرتەکە ئاماژە بەوە دەکات کە ڕێژەی قەڵەوی لەنێوان گەورەساڵانی جیهاندا لە دوای ساڵی 1990وە دوو هێندە زیادی کردووە، و لەنێوان مێردمنداڵانیشدا چوار هێندە گەشەی کردووە.
ئەم دیاردەیە تەنها کێشەیەکی تەندروستی نییە، بەڵکو کاریگەریی ڕاستەوخۆی لەسەر تێچووی چاودێریی تەندروستی و دابەزینی توانای بەرهەمهێنانی هێزی کار هەیە، ئەمەش دەبێتە تەحەدایەکی گەورە بۆ ئابووریی وڵاتان.