مزگەوتی مێژوویی “نەبی یونس” لە شاری مووسڵ، ئەمڕۆ چوارشەممە، 27-5-2026، دوای 12 ساڵ یەکەمین نوێژی جەژنی تێدا کرا، ئەمەش دوای ئاوەدانکردنەوەی مزگەوتەکە کە پێشتر لەلایەن ڕێکخراوی داعشەوە تەقێندرابووەوە.
محەمەد عەبدولوەهاب شەماع، پێشنوێژ و وتاربێژی مزگەوتەکە ڕایگەیاند: “مزگەوتەکە ئەمڕۆ پێشوازی لە یەکەمین نوێژی جەژن کرد لە دوای تەقاندنەوەی لەلایەن چەکدارانی داعشەوە ، گوتیشی، نوێژەکە لە کەشێکی پڕ لە ئیمانداری و ڕۆحیەتدا بەڕێوەچوو، کە تێیدا هەزاران نوێژخوێن لە ناوچە جیاجیاکانی مووسڵەوە ڕوویان تێکردبوو”.
شەماع ئاماژەی بەوەش کرد، گەڕانەوەی نوێژ بۆ ئەم مزگەوتە ساتەوەختێکی زۆر گرنگە بۆ خەڵکی مووسڵ، بەهۆی ئەو سیمبولییەتە ئاینی و مێژووییە گەورەیەی کە ئەم شوێنە لەلای دانیشتووانی شارەکە هەیەتی.
گرنگیی مێژوویی و شوێنەواریی مزگەوتەکە
مزگەوتی نەبی یونس یەکێکە لە دیارترین شوێنەوارە ئاینی و کولتوورییەکانی شاری مووسڵ، جگە لەوەی گرنگییەکی شوێنەواریی تایبەتی هەیە بەهۆی هەڵکەوتنی لە نزیک پاشماوەکانی کۆشکی مێژوویی “سەرحەدۆن”.
ئەم شوێنەوارە گرنگە لە ساڵی 2014 ڕووبەڕووی وێرانکارییەکی بەرفراوان بووەوە، دوای ئەوەی لەلایەن ڕێکخراوی داعشەوە لە کاتی کۆنترۆڵکردنی شارەکەدا تەقێندرایەوە.
