وەزارەتی بازرگانیی عێراق ڕایگەیاند کە کار بۆ پڕۆژەیەکی ستراتیژی دەکەن بە مەبەستی دامەزراندنی “بۆرسەی عێراقی بۆ کاڵا خۆراکییەکان”. ئامانجی سەرەکی ئەم پڕۆژەیە ڕێکخستنی نرخەکان و پاراستنی بەرهەمی ناوخۆییە، لەگەڵ دیاریکردنی پلانی هەناردەکردنی ئەو بەرهەمە ستراتیژییانەی کە لەم وەرزەدا (٢٠٢٦) زیادەن.
محەمەد حەنوون، وتەبێژی وەزارەتی بازرگانی گوتی: ئەمه پڕۆژەیەکە بۆ مامەڵەکردن بە بەروبوومەکان بە شێوەیەکی شەفاف و لەسەر بنەمای “خستنەڕوو و داواکاری”، ئەمەش دەبێتە هۆی کەمکردنەوەی دەستی ناوەند (دەڵاڵەکان) و سەقامگیریی نرخ.
راشیگەیاند: وەزارەت کار دەکات بۆ بەستنەوەی مەرزەکان و بەندەرەکان بە سیستمێکی ئەلیکترۆنی بۆ شوێنپێهەڵگرتنی بارەکان (Tracking) لە وڵاتی بنەڕەتییەوە تا دەگاتە کۆگا نێوخۆییەکان.
حەنوون گوتی: بۆ وەرزی ٢٠٢٦، ئەگەر بڕی بەرهەم لە پێداویستی ناوخۆ زیاتر بوو، عێراق پلانی هەیە ئەو زیادەیە هەناردە بکات بۆ ئەوەی ببێتە سەرچاوەیەک بۆ داهاتی دەوڵەت و پاڵپشتی جوتیاران.
