گوتەبێژی فەرماندەی گشتیی هێزە چەکدارەکان، سەباح ئەلنەعمان، ڕایگەیاند کە ئەو لیژنەیەی بە فەرمانی سەرۆکوەزیران و فەرماندەی گشتی پێکهێنراوە، دەستی بە کارەکانی کردووە بۆ کۆنتڕۆڵی چەک لە دەستی دەوڵەتدا. ئاماژەی بەوەش کرد کە پڕۆسەی فەکیکردن و جیاکردنەوەی لایەنەکان لە حەشدی شەعبی، پێکهاتەسازیی دووبارەی هێزەکان و مسۆگەرکردنی مافی چەکدارەکان لەخۆدەگرێت.
ئەلنەعمان جەختی کردەوە کە پێکهێنانی ئەم لیژنەیە بڕیارێکی تەواو عێراقییە و وەک وەڵامدانەوەیەکە بۆ داواکاریی مەرجەعییەت، لەپاڵ جێبەجێکردنی کارنامەی وزاریی حکومەت بۆ کۆنتڕۆڵی چەک و یەکخستنی گوتاری ئەمنی.
ڕادەستکردنی چەک و سەربازگەکان: لیژنەکە میکانیزمی پێویست دادەنێت بۆ تێکەڵکردنی ئەو هێزانە بە دەزگا ئەمنییە فەرمییەکان، و پێویستە لە ماوەی دوو ڕۆژدا لیستێکی تەواوی چەک، کەرەستە سەربازییەکان و سەربازگەکان ڕادەستی لیژنە ناوەندییەکە بکرێت.
پێکهاتەی لیژنەکە و مافی شەڕکەران: ئەم لیژنە ناوەندییە بە چاودێریی ڕاستەوخۆی فەرماندەی گشتی کار دەکات و نوێنەرانی وەزارەتەکانی بەرگری، ناوخۆ، ئۆپەراسیۆنە هاوبەشەکان و دەستەی حەشدی شەعبی لەخۆدەگرێت. ئامانجی پڕۆسەکەش ڕێکخستنەوەی کارگێڕی و پاراستنی تەواوی مافە دارایی و یاساییەکانی شەڕکەرانە دوای تێکەڵبوونیان لەگەڵ سوپادا.
هەواڵی پێشوو