ئەڤرۆ سێشەمبی، د. عەلی تەتەر، پارێزگارێ دهۆکێ پێشوازی ل د. داود سلێمان، سەرۆکێ زانکۆیا دهۆک کر. د دیدارەکێ دا باس ل رەوشا زانکۆیێ، پڕۆژەیێن داهاتی و بەرهەڤیێن سالا نوو یا خواندنێ هاتە کرن.
ل دویڤ ڕاگەهاندنا پارێزگەها دهۆکێ، د کۆمبوونێ دا باس ل پێشەنگیا زانکۆیا دهۆک د پرۆسەیا متمانەبەخشینێ دا هاتە کرن. هەروەسا جەخت ل سەر گرنگییا پێشئێخستن و پاراستنا کەلتۆر، زمان و دیرۆکا کوردی وەک ئەرکەکێ نەتەوەیی و زانستی یێ زانکۆیێ هاتە دۆپاتکرن.
تەوەرەکێ دی یێ دیدارێ، تایبەت بوو ب “پەیمانگەها چارەسەریا دەروونی و تراومایێ” ل زانکۆیا دهۆک. پارێزگارێ دهۆکێ سوپاسییا وەلاتێ ئەڵمانیا کر بۆ وان پشتەڤانیێن بەردەوام یێن د وارێ مرۆڤی و زانستی دا پێشکێشی زانکۆیێ دکەن.
د پشکەکا دی یا گۆتۆبێژان دا، رەوشا مامۆستایێن زانکۆیێ و ئاستێ بەرهەڤیێن سالا نوو یا خواندنێ ٢٠٢٦-٢٠٢٧ هاتنە هەلسەنگاندن.
د. عەلی تەتەر، پارێزگارێ دهۆکێ دەستخۆشی ل هەولێن سەرۆکاتییا زانکۆیێ کر و ڕاگەهاند: “ئیدارەیا پارێزگەهێ ب هەمی شیانان پشتەڤانییا پڕۆژەیێن داهاتی یێن زانکۆیا دهۆک دکەت، ب ئارمانجا بلندکرنا ئاستێ ئەکادیمی و زانستی ل دەڤەرێ.”