ئه‌مڕۆ یه‌كشه‌ممه 14-7-2024، به‌سه‌رپه‌رشتی ئومێد خۆشناو پارێزگاری هه‌ولێر و نوێنه‌ری ده‌زگای خێرخوازی بارزانی و قایمقامی قه‌زای ناوه‌ند و سه‌رۆكی شاره‌وانی هه‌ولێر و به‌ڕێوه‌به‌ری گشتیی شاره‌وانییه‌كان و به‌ڕێوه‌به‌ری گشتیی ئاو و ئاوه‌ڕۆ و به‌ڕێوه‌به‌رانی ئاوی هه‌ولێر و ده‌وروبه‌ری و به‌ڕێوه‌به‌ری كۆچ و كۆچبه‌ران و وه‌ڵامدانه‌وه‌ی قه‌یرانه‌كانی پارێزگای هه‌ولێر، كۆبوونه‌وه‌یه‌كی فراوان له‌باره‌ی پرسی ئاوی ماڵان به‌ڕێوه‌چوو.
له كۆبوونه‌وه‌كه‌دا ئاماژه به‌و هه‌نگاو و پڕۆژانه كرا، كه ده‌بنه هۆی چاره‌سه‌ری بنه‌ڕه‌تی بۆ ئه‌و كێشانه‌ی له‌كاتی دابه‌شكردنی ئاو به‌سه‌ر گه‌ڕه‌كه‌كانی شاری هه‌ولێر درووست ده‌بن.
پارێزگاری هه‌ولێر ته‌واوی لایه‌نه‌كانی راسپارد، به‌ده‌م داواكارییه‌كانی هاووڵاتییانه‌وه بچن و ته‌واوی پاڵپشتییه‌كانی پارێزگا نیشان بدەن.
ئه‌وه‌شی خسته‌ڕوو، چه‌ندین پڕۆژه ده‌ست پێكراوه، كه به‌هۆیانه‌وه گرفته‌كانی كه‌مئاوی چاره‌سه‌ر ده‌بن و كه بریتیین له لێدانی بیری ئاوی نوێ له‌و شوێنانه‌ی كه بیره‌كان به‌هۆی كاریگه‌رییه‌كانی كه‌شوهه‌وا و وشكه‌ساڵییه‌وه وشكبوون، جیا له دابینكردنی كاره‌با و ته‌واوی پێداویستییه‌كانی دیكه، كه ده‌بنه هۆی دابینكردنی ئاوی پێویست بۆ هاووڵاتییان.
بڕیاریش درا تاوه‌كو ئه‌و پڕۆژانه ته‌واو ده‌بن، به هاوكاری و هه‌ماهه‌نگی ده‌زگای خێرخوازی بارزانی، له رێگه‌ی ته‌نكه‌ره‌وه له ماوه‌یه‌كی كورت ئاوی پاك بگه‌یه‌ندرێته هه‌موو ئه‌و هاووڵاتییانه‌ی كه پێویستییان به ئاوه.
پارێزگاری هه‌ولێر راشیگه‌یاند، له ماوه‌یه‌كی زۆر كورت ته‌واوی گرفت و ئاڵنگارییه‌كان كه دێنه به‌رده‌م پرۆسه‌ی گه‌یاندن و دابه‌شكردنی ئاوی پاك بۆ ماڵان چاره‌سه‌ر ده‌بن و تیمه هونه‌رییه‌كانی پارێزگای هه‌ولێر خه‌ریكی چاره‌سه‌ركردنی گرفته‌كانن.
جه‌ختیشی له رێگریكردن له زێده‌ڕۆییكردن بۆسه‌ر هێڵه‌كانی ئاو كرده‌وه، داواشی كرد هاووڵاتییان ده‌ست به ئاوه‌وه بگرن و به گوێره‌ی پێویستییه‌كانیان به‌كاری بهێنن.
ئاماژه‌ی بۆ ئه‌وه‌شكرد، هاووڵاتییان ده‌ستكاری قوفڵه‌كانی دابه‌شكردنی ئاو نه‌كه‌ن، تیمه‌كانی به‌ڕێوه‌به‌رایه‌تی ئاوی هه‌ولێر به هاوسه‌نگی ئه‌ركی دابه‌شكردنی ئاویان له ئه‌ستۆدایه و ئه‌وان به گوێره‌ی به‌رنامه‌كانیان ئه‌و كاره ئه‌نجام ده‌ده‌ن.
ئومید خۆشناو، له زۆربه‌ی گه‌ڕه‌كه‌كانی شاری هه‌ولێر گرفتی گه‌یاندن و دابه‌شكردنی ئاوی پاك چاره‌سه‌ر كراوه، ئه‌و شوێنانه‌ش كه ماون، له ئایینده‌یه‌كی نزیك گرفته‌كانیان چاره‌سه‌ر ده‌بن.
دووپاتیشیكرده‌وه، چاره‌سه‌ركردنی گرفتی ئاو له‌شاری هه‌ولێر له ئه‌وله‌وییه‌تی كارنامه‌ی كابینه‌ی نۆیه‌م و خوودی سه‌رۆكوه‌زیران مه‌سرور بارزانییه، له ئایینده‌دا له رێگه‌ی كۆمه‌ڵێك پڕۆژه‌وه ئه‌و گرفتانه به یه‌كجاره‌كی بنبڕ و چاره‌سه‌ر ده‌بن.