به تۆمه‌تی دزینی 170 سه‌ر ئاژه‌ڵ، مه‌فره‌زه‌كانی نووسینگه‌ی نه‌هێشتنی تاوانی دووكان دوو تۆمه‌تباریان ده‌ستگیر كرد.
ئه‌مڕۆ سێشه‌ممه 3ی 9ی 2024، به‌ڕێوه‌به‌رایه‌تیی پۆلیسی سلێمانی ڕاگه‌یاندراوێكی بڵاو كرده‌وه و تێیدا هاتووه، دوای ئه‌وه‌ی هاوڵاتییه‌ك سكاڵای تۆماركرد كه 170 سه‌ر مه‌ڕی لێ دزراوه، ده‌ستبه‌جێ هێزه‌كانی پۆلیس لێكۆڵینه‌وه‌كانیان ده‌ستپێكرد و پاش گه‌یشتنه ئه‌نجامی لێكۆڵنه‌وه‌كان و وه‌رگرتنی بڕیاری دادوه‌ر، توانرا ئاژەڵەكان له سنووری قه‌زای چه‌مچه‌ماڵ به‌هاوكاری ئاسایشی چه‌مچه‌ماڵ بدۆزرێنه‌وه.
ئه‌وه‌ش خراوه‌ته ڕوو، له‌لایه‌ن مه‌فره‌زه‌كانی نووسینگه‌ی نه‌هێشتنی تاوانی دووكانه‌وه دوو تۆمه‌تبار ده‌ستگیركران و له به‌رده‌م دادوه‌ری لێكۆڵینه‌وه‌دا دانیان به تاوانه‌كه‌یان ناوه و هه‌روه‌ها ئاژەڵەكان ڕاده‌ستی خاوه‌نه‌كه‌ی كرایه‌وه.
لە کاتی دەستگیرکردنی تۆمەتبارەکاندا دەستیشگیرا بەسەر ئۆتۆمبێلێکدا کە بەتۆمەتباران بووە.
هاوكات پۆلیسی سلێمانی له ڕاگه‌یاندراوه‌كه‌یدا ئه‌وه‌ش هاتووه، ئێستا هه‌ر دوو تۆمه‌تبار (ب، م، ح له‌دایكبووی 1993 و ر، س، م له‌دایكبووی 1986) به بڕیاری دادوه‌ر و به‌پێی ماده‌ی 444 له‌یاسای سزادان ڕاگیراون و لێكۆڵینه‌وه‌كان به‌رده‌وامه.