لەمیانەی كۆبوونەوەی نێوان ئومێد خۆشناو پارێزگاری هەولێر و محەمەد قایە سەرۆكی ژووری بازرگانی و پیشەسازی ئامەد، بڕیاردرا بەم نزیكانە گەشتەكانی نێوان فڕۆكەخانەی هەولێر و ئامەد دەست پێ بكاتەوە.
لە كۆبوونەوەكەدا سەرۆکى ژوورى بازرگانى و پیشەسازى ئامەد بە وردی باسی لەو پڕۆژانه کرد کە لەبەردەستیاندایە و بە فەرمى پارێزگارى هەولێرى بانگهێشت کرد بۆ ئامادەبوون لە کردنەوەى پێشانگەى کشتوکاڵى و گەشتیارییەى کە بڕیارە لە 2024.4.30 بە بەشدارى ژمارەیەکى زۆر لە کۆمپانیاى گەشتیارى و کشتوکاڵی وڵاتانى جیهان و تورکیا لە شارى ئامەد بکرێتەوە.
پارێزگاری هەولێر وێڕای قەبووڵکردنى بانگهێشتنامەكە بۆ بەشداربوون لە پێشانگەى کشتوکاڵى و گەشتیاری ئامەد، جەختى لەوە کردەوە كە هەمیشە دەرگەى کراوەیە بۆ هەر پرۆژەیەکى بازرگانى، پێشەسازى، گەشتیارى، کشتوکاڵی و ئامانجی حکوومەتی هەرێمی کوردستان پەرەپێدانی کشتوکاڵ و کەرتی گەشتیارى و پیشەسازییە، بۆیە بە هەموو شێوەیەک پشتیوان و هاوکار دەبن.
لەتەوەرێکى تردا باس لە دووبارە دەستکردنەوە بە گەشتى ڕاستەوخۆى نێوان فڕۆکەخانەى هەولێر و ئامەد بەم نزیکانە کرا، هەروەها ئومێد خۆشناو تیشکى خستە سەر ئەوەى کە کردنەوەى دووبارە گەشتیى نێوان فڕۆکەخانەى هەولێر – ئامەد جگە لەوەى سوودى زۆرى دەبێت بۆ هاووڵاتییان، هۆکارێکى دیکەشى بەهێزبوون و پەرەپێدانى جوولەى بازرگانى و پیشەسازییە بۆ هەرێمى کوردستان و وڵاتى تورکیا.