سەرۆكی دەستەی وەبەرهێنان رایگەیاند، ژووری بازرگانیی ئەمریكا كە نوێنەرایەتی سێ ملیۆن كۆمپانیا دەكات ئامادەیی كۆمپانیاكانی ئەمریكای بۆ وەبەرهێنان لە هەرێمی كوردستان دەربڕیووە.
د. محەممەد شوكری، سەرۆكی دەستەی وەبەرهێنانی حكومەتی هەرێمی كوردستان رایگەیاند: “كۆمپانیا ئەمریكییەكان لە پێشەنگی كۆمپانیاكانی وڵاتانی بیانی دێن لە وەبەرهێنان لەهەرێمی كوردستاندا، سەردانەكەی سەرۆكی حكوومەتی هەرێمی كوردستان بۆ ئەمریكا ئاسۆكانی وەبەرهێنانی كۆمپانیا ئەمریكییەكان فراوانتر دەكات.”
ئاماژەی بەوەش دا: “بە دڵنیاییەوە لە دوای ئەم سەردانە ئاستی وەبەرهێنان و ژمارەی كۆمپانیا ئەمریكییەكان لە هەرێمی كوردستان ڕوو لە زیادبوون دەكات، ژینگەی هەرێمی كوردستانیش لە ناوچەی ڕۆژهەڵاتی ناوەڕاست بۆ ئەمریكییەكان ژینگەیەكی لەبارە و هاندەرە بۆ هاتنی گەورە كۆمپانیاكانی ئەو وڵاتە و ئەنجامدانی وەبەرهێنان.”
محەمەد شوكری باسی لەوەش كرد: “جێگری سەرۆكی ژووری بازرگانیی ئەمریكا بۆ كاروباری ڕۆژهەڵاتی ناوەڕاست، ئامادەیی كۆمپانیاكانی ئەمریكای بۆ وەبەرهێنان لە هەرێمی كوردستان دەربڕی، ئەمەش بۆ ئێمە گرنگە، بەتایبەتی كە ئەم ژوورەی بازرگانی نوێنەرایەتی سێ ملیۆن كۆمپانیا دەكات و لە ساڵی ڕابردووش شاندێكی باڵایان سەردانی هەرێمی كوردستانیان كرد و بەڵێنیان دا، لەگەڵ شاندی دیكە بگەڕێنەوە كوردستان.”
دەشڵێت: “هاتنی كۆمپانیا گەورە و مامناوەندەكانی ئەمریكا بۆ هەرێمی كوردستان و ئەنجامدانی وەبەرهێنان، دەبێتە هاندەرێك بۆ هاتنی ژمارەیەكی یەكجار زۆری كۆمپانیا بیانییەكان و واڵابوونی دەرفەتەكانی كاركردن و هاوبەشیكردنی كۆمپانیا نێوخۆییەكان لەگەڵیاندا.”
سێ هەزار و 500 كۆمپانیای بیانی لە كوردستانن
سەرۆكی دەستەی وەبەرهێنان جەختی كردەوە: “ئێستا سەرووی 35 هەزار كۆمپانیا لە هەرێمی كوردستان تۆمار كراون و سێ هەزار و 500 كۆمپانیای بیانین كە 175 یان بەریتانین و ژمارەیەكیشیان ئەمریكی و توركی و ئێرانی و ئیماراتین. لەلایەكی دیكەوە فراوانكردنی ئاسۆكانی وەبەرهێنانی بیانی دەبێتە هۆی دابینكردنی دەرفەتی گەورەی هەلی كاریش بۆ گەنجەكانمان.”