لە سنووری پارێزگای هەولێر 91 پڕۆژەی پیشەسازی زەویان بۆ تەرخانكراوە
بەپێی راگەیاندراوێكی پارێزگای هەولێر، ئەمڕۆ سێشەممە 2026\4\21، بە سەرپەرشتی ئومێد خۆشناو، پارێزگاری هەولێر و بە ئامادەبوونی هێمن قادر، جێگری پارێزگار و ئەندامانی دیكەی لێژنەکە، کۆبوونەوەی لێژنەی گەشەپێدان و پشتگیری پڕۆژە پیشەسازییەکان لە چوارچێوەی هەوڵەکان بۆ پەرەپێدانی کەرتی پیشەسازی و ئابووری لە سنوری پارێزگای هەولێر ئەنجامدرا.
ئاماژە بەوە دراوە، لەکۆبوونەوەکەدا گفتوگۆ لە بارەی جۆر و پێویستی خزمەتگوزارییەکان، ئامانج و بەرهەمی پڕۆژە پیشەسازییەکان کرا.
پارێزگاری هەولێر، وێڕای دەستخۆشی لە کارەکانی لێژنەکە، جەختی لەسەر پێویستی چارەسەرکردنی کێشە و گرفتەکانی بەردەم پڕۆژەکانی وەبەرهێنان و پیشەسازییە گەورە، مامناوەند و قورسەکان کردەوە، بەپێی یاسا و ڕێنماییە بەرکارەکان.
ئەوەش خراوەتە روو، دوای گفتوگۆکردن و هەڵسەنگاندنی پڕۆژە پیشەسازییەکان و کار و بەرهەم و ئامانج و مەبەستی پڕۆژەکان، بڕیاری پێویست لە بارەی ئەو پڕۆژانە درا کە داوای تەرخانکردنی زەویان کردبوو و ڕەزامەندی لەسەر دابینکردنی زەوی بۆ 91 پڕۆژە درا .
بەپێی راگەیاندراوەكە، بە مەبەستی ڕێکخستنەوە و چاودێریکردنی وردی پڕۆسەكە، بڕیاری پێکهێنانی لێژنەیەکی تایبەت درا بۆ چاودێریکردنی پڕۆژە پیشەسازییەکان، هاوکات چەند بڕیارێکی دیكەی گرنگی پەیوەست بە گەشەپێدانی زیاتری ئەم کەرتە درا.
پەرەپێدانی ژێرخانی ئابووری و پیشەسازی یەکێکە لە کارە لەپێشینەکانی حکومەتی هەرێمی کوردستان و لەم چوارچێوەیەشدا ژینگەیەکی لەبار بۆ وەبەرهێنەران ڕەخسێندراوە بۆ دروستکردنی کارگەی جۆراوجۆر، کە جگە لە بەگەڕخستنی سەرمایە، بووەتە هۆی ڕەخساندنی هەلی کارێکی زۆر بۆ هاووڵاتییان.