ماوەی دوو دەیەیە عێراق بووەتە گۆرەپانی ململانێ لە نێوان ئەمەریکا و ئێران، بەڵام ئەمڕۆ ئەم هاوسەنگییە بە تەواوی کەوتووەتە مەترسییەوە و چاوەڕوانكراوە بەلایەكدا بكەوێت.
بەگوێرەی توێژینەوەیەکی نوێی گرووپی قەیرانە نێودەوڵەتییەکان (International Crisis Group)، عێراق چیتر تەنیا مەیدانی ململانێ نییە، بەڵکوو بووەتە ئامانجی ڕاستەوخۆی ئێران و ئەمەریكا.
حکوومەتی عێراق سەرەڕای بانگەشەی بێلایەنی، نەیتوانیوە رێگری لە ئاڵۆزییەکان بکات. گرووپە چەکدارەکان کە بە مقاوەمەی ئیسلامی لە عێراق ناسراون و نزیکن لە تاران، زیاتر لە 750 هێرشیان کردووەتە سەر ئامانجەکانی ئەمەریکا. ئەمە لەکاتێکدایە کە واشنتۆنیش بە هەمان شێوە وەڵامی سەربازیی داونەتەوە و ئەمەش هاوسەنگییەکەی تێکداوە.
بەهۆی داخستنی گەرووی هورمز و پچڕانی هەناردەی نەوت، عێراق نزیکەی 90%ـی داهاتەکەی لەدەست داوە. توێژەرانی گرووپی قەیرانەکان هۆشداریی دەدەن کە ئەگەر هەناردەی نەوت بەردەوام نەبێت، حکوومەتی عێراق لە دابینکردنی مووچە و خزمەتگوزارییە سەرەتاییەکان (وەک کارەبا کە پشت بە غازی ئێران دەبەستێت) تووشی قەیرانێکی وێرانکەر دەبێت.