ئەمڕۆ لە مەراسیمێکی شایستەدا لە شاری هەولێر، بە ئامادەبوونی کەسوکار، بەرپرسانی حکومی، نووسەران و کۆمەڵێکی زۆر لە ڕۆشنبیران، تەرمی نووسەر و بیرمەند (فارووق ڕەفیق) بەرەو شاری سلێمانی بەڕێکرا.
لە کاتی بەڕێکردنی تەرمەکەی فارووق ڕەفیق بە ئاڵای کوردستان داپۆشرابوو و بە چەپکە گوڵی ڕێز و وەفا لەلایەن هاوڕێ و هاوپیشەکانییەوە دەورە درابوو. ئامادەبووانی مەراسیمەکە بە خەمناکییەوە ماڵئاواییان لەو نووسەرە کرد کە تەمەنێکی زۆری لە پێناو فیکر و مەعریفەدا بەخشی.
بڕیارە تەرمی کۆچکردوو بگاتە شاری سلێمانی و لەوێ لە مەراسیمێکی جەماوەریدا لە ئامێزی خاک بنێژرێت.
فارووق ڕەفیق، وەک یەکێک لە نووسەر و بیرمەندە دیارەکانی کوردستان، خاوەنی چەندین بەرهەمی فیکری و فەلسەفییە و دوێنێ بەهۆی نەخۆشییەوە کۆچی دوایی کرد، کۆچەکەشی دەنگدانەوەیەکی زۆری لە ناوەندە ڕۆشنبیرییەکانی هەرێمی کوردستان دروستکرد.